【笑到最後】點解要越洋買中概股 - 高明

更新時間 (HKT): 2020.09.28 02:00
■中芯完全去美國化,年底可製造40納米晶片,難怪美帝要出口管制。 互聯網圖片

中芯(981)遭到美國政府列為出口管制對象,高明想借中芯被制裁,講吓近期興起買美股嘅一種歪風,就係去到美股市場樂此不疲咁買中概股。

有日股領袖喺節目問高明,京東(9618)應該美國定香港買?高明雖然從無買過京東,但即刻就答香港買。原本喺美國上市,無啦啦返香港上,仲要唔係個別一隻,係一堆,一定係聞到燶味,先縮返去主場。反正香港都買到,無理由做散仔要逆流返去險境。

情況正如去旅行,都唔會特登去搵唐人街餐館食飯。點解一開始唔喺買ATMX、比亞迪(1211)?兜個圈做人開心啲?

站喺大中華角度,點解美帝會狙擊華為?一定係不想中國強大,而華為嘅手機又同蘋果有得比,於是美帝就要阻止華為崛起。

相同標準,一樣解釋到TikTok同中芯,兩者都係行業嘅巨人,特別係中芯,完全去美國化年底已可製造40納米晶片,難怪美帝要出口管制。

5G機站、手機、社交平台、晶片代工,下一個被對付對象,不外乎係AI或者電動車,中國嘅電動車發展,淨係睇股價,已有挑戰美國嘅實力。電動車嘅自動駕駛,需要先進嘅晶片技術,打壓中芯,估計中國國內電動車發展間接已受影響。如果下一步直接對中國電動車入面嘅零件進行出口管制,未必阻唔到中國電動車發展,但下一步嘅自動駕駛就會被拋離。又例如蔚萊自動駕駛嘅Nio Pilot,係用Intel旗下Mobilieye。

美國上嘅中概股唯一優點,就係較多中文資料,分析會方便啲,但又點夠香港上嘅中概股多中文資料呢?所謂我討厭政治,只係想賺錢,未有中芯禁運前已知,美國上嘅中概股好危險,同一個概念,孭多一層制裁風險,係咪搵自己笨?

(證監持牌人,持有蘋果)

高明

fb.com/bigricetea

關心你飯碗,貼近你生活,即Like「蘋果ATM」FB專頁!
BannerBanner