懶人投資|月供高息股慘案頻生 新手老手齊中伏 專家教搣甩4大失誤

更新時間 (HKT): 2020.09.29 00:00

「領展(823)我計落輸咗28%呀!乜月供股票唔係賺錢嘅咩?點解我會蝕?」近年月供股票這種投資方式大行其道,吸引不少不諳投資的打工仔參與,務求透過平均成本法低位加注、高位減注拉低成本,買入收息型的藍籌股,希望「躺着也賺錢」。殊不知不少人月供滙控(005)、港鐵(066)、領展(823)等熱門高息股,卻越供越縮水,距離財務自由夢想越來越遠。有見及此,《蘋果》找來專家一同剖析散戶月供股票個案,得出所犯的四大失誤,逐點擊破,務求令懶人投資法「懶得有道理」。

除了一般證券行之外,不少銀行亦有提供月供股票計劃,更以信用卡儲積分等優惠搶客,這種投資方式,近年深受想儲蓄兼賺取穩定回報的打工仔歡迎。

信奉懶人投資法的財經記者Koey,由去年4月起開始月供股票,更選供當時如日中天的領展,可惜全球遇上武漢肺炎疫情,過去一年不少藍籌大跌,領展更在一年內跌近30%,令她又儲錢變蝕錢;另一位逾年炒股經驗的Jason更因為將月供股票倉變成短炒倉去操作,令到原本大賺的股票變成小賺甚至蝕錢。新手、老手都輸錢,究竟月供股票有甚麼選股及操作準則?

一、「汰強留弱」新手惡習

月供股票的最大優勢是平均成本法,以定額方式持續買入股票,在股價高企時買入數量較少,價格低迷時買入量相應增加,同時要遵守長期儲錢習慣。

投資股票一年多的新手Koey,自行操盤的股票倉少嚐勝仗,「炒咗半年股都成日輸錢,又成日忍唔住想賣走佢。」於是便投入月供股票行列,去年4月起開始月供港鐵(066)以及領展(823),5個月後再加入港交所(388)。領展股價由去年7月起升至高位99.8元後開始回落,其平均買入價為87.25元,以前收市價63.55元計,蝕約27%,未計使費,連同股息也要蝕近25%。港鐵亦在同月升至55.7元高位後回落,她的買入均價為46.65元,以現價39.45元計蝕約13%,連股息亦蝕逾一成。

至於去年10月起開始供的港交所,起始供股價為235.2元,連續供了10個月,股價亦不斷上升,買入均價為252.43元,但她卻在360元左右停供,並在今年7月份時以377.2元賣出大部份月供的港交所,她當時認為應該止賺,「我見到賺咗大約30%,所以想賣咗佢轉供其他股票。」結果港交所最高曾升至397.8元,即使目前股價回落,仍處於360元左右的水平。

《蘋果》專欄作家唐牛認為,很多人忘記了選擇月供股票的初心及守則,「月供就係幫你避免咗估上落嘅風險,等你唔使自己操盤炒波幅,讓你keep住一個金額去買股票;同埋月供股票係睇長時間,5年甚至10年,你咁快沽走股票就係違背咗月供股票呢樣嘢。」因應Koey的個案,唐牛認為大可重新月供港交所。

唐牛認為,月供股票亦要嚴守紀律,月供固定金額,「如果市旺時買少啲,跌嘅時間買多啲,咁即係你估緊個市,咁就唔係月供儲錢喎,係炒股喎!」

二、老手忌多手以月供倉操盤

本身是證券行經紀的Jason,有逾10年炒股經驗,近年月供股票的原因是戒掉壞習慣,「我信一條方程式,就係只要每年有7%回報,10年就可以將個投資翻倍,咁我月供咗一年多啲,平日對住報價錢,手痕不停買賣,又會有恐懼同貪心,所以想克服呢啲壞習慣。」他月供的股票有港鐵、盈富基金(2800)以及比亞迪電子(285),當中港鐵及盈富蝕錢,盈富過去一年累跌近16%,比亞迪電子則累升250%。理論上Jason的月供倉應該大賺,但他卻將月供倉當作短炒倉操作,「我沽得好衰,十幾蚊就賣咗月供嘅比亞迪電子,之後廿蚊樓上又用短炒倉嘅錢去買返,出出入入,改唔到壞習慣。」他沽出比亞迪電子後,該股節節上升,最高曾見43.7元,最近回落至36.75元,較一年前仍有不俗的升幅,Jason明顯落錯車,他斷供比亞迪電子後,轉供煤氣(003),並表示希望不會再沽出月供倉的任何股票。

不過作為業內人士,Jason明言月供股票可選擇的股份不多,「冇理由只可以供藍籌股同其他幾隻股票咁少,例如我最近留意印度ETF,覺得印度市場增長幾好,或者月供美股又得唔得呢?」總結Jason過去一年月供的3隻股票中,港鐵及盈富基賬面蝕約20%,比亞迪電子則賺30%,月供倉賬面基本持平,但由於錯誤操作賣走比亞迪電子,令Jason由大賺變成平手,可見嚴守紀律的重要性。

三、切記審視基本因素及派息

Koey月供領展超過一年,賬面蝕近30%,儘管每年有股息收入,卻賺息蝕價,到底現時應否轉供其他股票?轉供煤氣是否解決方法?

唐牛認為,選擇月供股票首先要認清月供的概念,「你要記得你初初供嗰陣,隻股票都有賺錢,尤其揀收息股,最重要睇佢派息是否穩定。」

雖然月供股票以平均成本法作投資,但唐牛認為就算有多懶,亦應該定期留意買入的股票,「如果佢唔派息,或者好似煤氣咁冇咗十送一(紅股),你就要諗吓(應否買入)。又例如港交所因為所有政策都傾斜畀佢而受惠,如果有一日深交所、滬交所可以搶到佢生意,間公司前景仲好唔好?就要諗係咪有換馬呢個動作。」月供股份的利好基本因素逆轉,便是換馬的理由。

四、收息、進攻股兼備 供3至4隻最佳

月供股票亦容易犯上all in收息股的錯誤。唐牛建議月供股票也要分散風險,買了一隻收息股,應該要買一隻平衡類種的股份,另外買一隻進攻型股份,「個倉唔可以死守收息股,好多股票返唔到轉頭,例如滙控(005)咁。」他認為平衡型股份可選擇盈富基金,「作為新手連間公司做乜都唔知,買ETF係最穩陣。」

他強調,月供股票理論上是以10年以上為單位,要分散風險,選一隻收息股,平衡型以及進取型的股份便可,但不應月供太多隻股票,3至4隻股票最佳。

舊經濟不受捧 藍籌跌多升少

另一散戶近年月供股票輸多贏少的原因,是股份升勢傾斜於高估值的新經濟股,價值型的高息舊經濟股則全線向下。

綜觀過往一年,50隻藍籌股當中,有32隻至今錄得下跌,僅18隻錄得上升,隨機揀選一隻藍籌股月供,命中率只有約三分之一。上升股份包括騰訊(700)、阿里(9988)等等高估值股份,下跌則不乏被視為穩陣、高息的熱門月供股份,包括滙控(005)(累跌48.8%)、恒生(011)(累跌28.9%) 、領展(823)(累跌24.4%)、港鐵(066)(累跌8.5%)。連同藍籌股,銀行一般有過百隻港股以供選擇,但月供客戶為求穩陣,一般選擇藍籌股為主。

-----------------------------

【全球樓行】 Dream House零距離

屬於香港人的移民攻略

-----------------------------

上車必讀天書 「九成按」入市懶人包

點擊即睇《按揭必讀手冊》電子書

----------------------------

支持蘋果深度報道,深入社區,踢爆權貴,即Like蘋果專題及調查組FB專頁

關心你飯碗,貼近你生活,即Like「蘋果ATM」FB專頁!
BannerBanner