【操盤手札記】會再聽到HK Bank嗎 - 割柑人

更新時間 (HKT): 2020.09.29 02:00
■中美冷戰下,滙控成磨心。滙控被視為香港人嘅銀行,由早年的左右逢源變現時的左右為難。 資料圖片

上周係銀行股黑色一周,貿易黑名單、FinCEN洩密、疫情反覆等壞消息迭出,法興、德銀跌逾一成;摩通、梅隆跌逾半成;滙控(005)、渣打(2888)跌逾8%,東亞(023)跌13%;四大內銀都跌約半成。周一,中港銀行股先行反彈。滙控受平保(2318)喺上周跌穿世紀供股價28元當日撈底增持刺激,反彈9%,收30.8元。

平保持有滙控達8%,成最大股東,究竟增持係為溝淡定為「吞象」呢?溝淡居多!平保2017年12月、2018年2月同11月都曾披露增持滙控,成本價平均達76元,相對今次成本價約28.3元,賬面勁蝕逾六成。至於係咪有內線消息滙控唔會被blacklist,就唔知喇!

科技股、銀行股相繼當黑,原因之一係中美冷戰下成磨心。滙控被視為香港人嘅銀行,由左右逢源變左右為難,亦係香港人寫照。1960年代起,該行英文簡稱為HongkongBank,1990年12月宣佈成立控股公司後,呢個簡稱仍沿用,到回歸後,1998年11月先由HSBC取代。

舊經濟股退,新經濟股上。今年焦點IPO,阿里巴巴(9988)旗下螞蟻集團,周一宣佈螞蟻銀行在港開業,更以高達2.5厘活期息搶客,似為螞蟻上市造勢。市傳螞蟻最快周二通過港交所聆訊,十.一假期後招股,10月底A+H同步上市。

螞蟻A股上周二已於上交所科創板提交註冊,5家參與配售嘅基金上周五凌晨開賣,已有逾500萬人認購。據報社保基金同5大主權基金,都會參與螞蟻A股IPO。招股文件披露,螞蟻預計首3季收入按年增長4成。螞蟻上市,阿里最為得益,上市前或率先炒上,不妨留意。

割柑人

關心你飯碗,貼近你生活,即Like「蘋果ATM」FB專頁!
BannerBanner