【智取大市】國進民退變國退民退 - 晉佳

更新時間 (HKT): 2020.09.30 02:00
■劉鶴話國企要對民企健康發展發揮帶動作用同重要影響力,即係話,效率高嘅民企做細佬,要聽效率低嘅國企話。 資料圖片

阿里(9988)同騰訊(700)係增長能力最強勁嘅中國巨型企業,兩間企業市值總共超過10萬億,多過頭5間銀行、頭兩間保險、頭3間石油同頭3間電訊龍頭國企嘅市值總和,睇得出市場點樣評價中國民企同國企。基本上冇國有企業能夠一己之力吞併佢哋,就知道喺中國14億人口嘅市場之內,出色嘅民企可以發揮到幾大嘅潛力,同埋國企如何停滯不前。

未來民企始終有後浪,可能會有下一間騰訊、下一間阿里,但為咗統戰,要鼓勵民企國企配合推進重組,劉鶴講到明國企要對民企健康發展發揮帶動作用同重要影響力,即係,效率高嘅民企做細佬,要聽效率低嘅國企話,推動起上嚟,你可以想像情況會點。要國企改革從而收窄同民企之間嘅經營能力差距?國企重組搞咁多年,聽到市場都放棄了。

維穩大於一切,要民企槍口一致對外,形成呢種所謂團結,就要付出咁大代價?

話分兩頭,要作出咁大犧牲,亦理解到𠵱家面對幾大嘅威脅。TikTok、WeChat被美國制裁事件勢阻止中國高科技走出去,但國企去管真係會好啲?只能說睇唔透。

五中全會將會喺10月26至29日召開,「十四五」規劃成為重點,仲會制訂「2035年遠景目標」。經過《關於加強新時代民營經濟統戰工作的意見》通知出爐後,維穩式經濟會成為「十四五」主旋律?國企管民企呢回事真的發揚光大,相信會為中共歷史留下一個重要嘅伏筆。

晉佳

fb.com/advanceguy1

關心你飯碗,貼近你生活,即Like「蘋果ATM」FB專頁!
BannerBanner