笑到最後|派錢係惟一議題(高明)

更新時間 (HKT): 2020.10.04 15:28
高明指,「臨時立法會」開會在即,今屆政府惟一應該做的事,就是派錢。

專家指,疫情第四波可能喺月中爆發,而目測9月初餐廳放寬至4人一枱後,食客明顯身心大解放。英國疫情再爆發,美國出現「白宮群組」,香港再爆發多次並唔出奇。本來頭等大事立法會選舉都被取消,證明疫情真係好嚴重,政府喺未來一年,應該放低所有其他擾民嘅立法,與民休息,具體做法就係全力派錢。

政府派完頭兩輪抗疫基金之後,開始放風話庫房冇錢,之後規模立即縮細,高層話審慎理財言論似是而非。太平盛世審慎理財就係為應急,好嘞,今年疫情,終於比過去任何一次經濟危機嚴重,以往都係金融出現問題,今次直頭冇得開舖、冇得飛,影響亦比起沙士更加嚴重,因為拖得更長,所以講到應急,有咩急得過而家呢?既然香港政府比全球各國嘅儲備都深厚,到需要用嘅時候仲儲嚟做乜呢?

香港過去20年,政府不斷儲備再儲備,每年要使錢時,總會話啲錢留嚟「環球經濟危機」或者應急時用,於是高峰時期儲超過20幾個月財政儲備。派錢後回落到16個月,其實只係個保守數字,每日股市、各項政府服務、抄牌等都有收入,政府根本冇可能全無收入之下使晒儲備,即使用盡亦可賣資產同發債,大把方法。

更加重要嘅係,財政司司長陳茂波已經預言,疫情之後經濟強勁反彈,即係過咗疫情之後,經濟向好,庫房自然會有稅收,咁點解仲要擔心而家使晒啲錢呢?

不斷派錢嘅好處,係製造財富效應,美股之低位反彈,其中一個原因,係美國刺激經濟措施人人派錢,啲人失業之後收到救濟金,經羅賓漢之類券商拎咗去買美股,推高美股估值,創造財富效應,繼而出現亞馬遜聘請超過10萬人嘅逆市擴張,反過來支持本土就業。美國新一輪刺激經濟政策亦都係影響美股走勢啲主因之一。點解美國得、香港唔得?因為香港派得唔夠狠!

上屆立法會經歷拉布,13議案未完成,有拉布,即係有爭議。尤其是已壽終正寢個4條,無論係空置稅、禁電子煙、專營的士定係垃圾徵費,草案本身就爭議極大。「臨時立法會」開會在即,一年任期好快完,不如只處理冇爭議項目,就係派錢,呢個亦係今屆政府惟一應該做嘅事。

高明

https://www.facebook.com/bigricetea/

掌握理財智慧 感受生活品味

investMAN全新網頁 優雅登場

-----------------------------

【全球樓行】 Dream House零距離

屬於香港人的移民攻略

-----------------------------

上車必讀天書 「九成按」入市懶人包

點擊即睇《按揭必讀手冊》電子書

----------------------------

支持蘋果深度報道,深入社區,踢爆權貴,即Like蘋果專題及調查組FB專頁

關心你飯碗,貼近你生活,即Like「蘋果ATM」FB專頁!
BannerBanner