【笑到最後】派錢係唯一議題 - 高明

更新時間 (HKT): 2020.10.05 02:00
■陳茂波預言,疫情之後經濟強勁反彈,到時庫房自然會有稅收,咁點解仲要擔心𠵱家使晒啲錢呢? 資料圖片

專家指,疫情第四波可能喺月中爆發。英國疫情再爆發,美國出現「白宮群組」,香港再爆發多次並唔出奇。政府喺未來一年,應該放低所有其他擾民嘅立法,與民休息,具體做法就係全力派錢。

政府派完頭兩輪抗疫基金之後,開始放風話庫房冇錢,之後規模立即縮細,高層話審慎理財言論似是而非。太平盛世審慎理財就係為應急,但今年疫情,比過去任何一次經濟危機嚴重,影響亦比起沙士更加嚴重,有咩急得過𠵱家呢?既然香港政府比全球各國嘅儲備都深厚,到需要用嘅時候仲儲嚟做乜呢?

香港過去20年,政府不斷儲備再儲備,每年要使錢時,總會話啲錢留嚟「環球經濟危機」或者應急時用,於是高峯時期儲超過20幾個月財政儲備。派錢後回落到16個月,其實只係個保守數字,每日股市、各項政府服務、抄牌等都有收入,政府根本冇可能全無收入之下使晒儲備,即使用盡亦可賣資產同發債,大把方法。更加重要嘅係,財政司司長陳茂波已經預言,疫情之後經濟強勁反彈,即係過咗疫情之後,經濟向好,庫房自然會有稅收,咁點解仲要擔心𠵱家使晒啲錢呢?

不斷派錢嘅好處,係製造財富效應,美股之低位反彈,其中一個原因,係美國刺激經濟措施人人派錢,啲人失業之後收到救濟金,經羅賓漢之類券商拎咗去買美股,推高美股估值,繼而出現亞馬遜聘請超過10萬人嘅逆市擴張,反過來支持本土就業。點解美國得、香港唔得?因為香港派得唔夠狠!上屆立法會經歷拉布,13議案未完成,有拉布,即係有爭議。「臨時立法會」開會在即,一年任期好快完,不如只處理冇爭議項目,就係派錢,呢個亦係今屆政府唯一應該做嘅事。

高明

fb.com/bigricetea

關心你飯碗,貼近你生活,即Like「蘋果ATM」FB專頁!
BannerBanner