【智取大市】阿里短線勝長線 - 晉佳

更新時間 (HKT): 2020.10.05 02:00
■阿里股價短優於長,至少有望強勢護送螞蟻上市,而螞蟻上市後亦有機會出現游資押注阿里追落後。 資料圖片

之前提及美團(3690)會係ATMX 之中最好嗰隻,至於阿里(9988)又點?系內推埋螞蟻集團上市,動作多多似乎股價唔會差得去邊。

中國零售業本來早已踏入成熟嘅行業周期,惟淘寶天貓靠AI令服務同效率不斷提升,依舊搶佔舊經濟市佔率,令其收入保持跑贏國內零售數據,業績顯示,疫情之下網購表現保持理想,但換句話說亦更快推進天貓、淘寶業務至飽和階段,未來要靠菜鳥、阿里雲同餓了麼去提供增長動力。

阿里近日預計菜鳥同阿里雲2021年轉盈,市場自然對阿里嘅增長持續性更為放心,成為股價近日跑贏嘅原因。雲業務方面,騰訊(700)暫時已經輸咗一條街,華為受美國制裁亦難有能力喺未來同阿里鬥,中國人信任國產貨之下,喺中國市場面對AWS同Azure斷估唔會太輸蝕。

若然相信阿里執行能力,就唔使太擔心網購方面嘅收入下滑得太快,多項業務協同效應可以畀到網購保持穩定盈利增長,估計預測全年度PE略高於30倍,確實唔算貴。長線股價風險主要係政治因素,包括中國推進民企重組以及美國可能嘅制裁,尤以前者風險最大,要留意嘅係,螞蟻嚟緊招股,長線知乜事。就咁睇嚟,阿里似乎短優於長,至少有望強勢護送螞蟻上市,而螞蟻上市後亦有機會出現游資押注阿里追落後,短線形勢不俗。

晉佳

fb.com/advanceguy1

關心你飯碗,貼近你生活,即Like「蘋果ATM」FB專頁!
BannerBanner