【操盤手札記】中美同現十月驚奇 - 割柑人

更新時間 (HKT): 2020.10.06 02:00
■美國大選在即,總統特朗普染疫,令戰況出現變數。資料圖片

十月驚奇,接踵而嚟!首先係美國大選在即,總統特朗普染疫;然後係中國五中全會將至,中央巡視組原專員董宏被查!先講美國,特朗普冧莊之戰出現變數,姑勿論係咪選舉tactic,博彩市場賠率顯示,特朗普同對手拜登嘅當選機會率都下跌,反而副總統彭斯上升!

至於中國,董宏向來被視為國家副主席王岐山嘅親信,國慶假期突然落馬,有劍指王岐山之嫌。繼王岐山好友、以敢言見稱嘅前華遠地產董事長任志強,喺9月22日以經濟罪名被判監18年後,事隔十日,輪到董宏出事,反映中共權鬥加劇。五中全會,人事變動勢成焦點。

五中全會將於10月26日至29日召開,議程包括研究制訂「十四五」規劃,為中美角力下,未來5年中國發展戰略提供藍圖,對港股後市亦有啟示。周一,中國股市仍在放假,港股喺北水截流,少條水喉下,不跌反升,挾升1.3%,收23767,仍受制20天線24100關。

講到「十四五」,有望受惠嘅概念股如內需消費股、半導體股、太陽能股、軍工股,近月輪流炒作,上周假期前夕,A股軍工股翻炒,晨曦航空(300581)飆兩成、中天火箭(003009)同新余國科(300722)亦飆一成。軍工股幾乎全屬央企,本港上市嘅寥寥可數。

中國航空工業集團有23間上市公司,20間為A股,3間為H股,係軍工集團中資產證券化最高,達53%。一旦提高國防預算,最為受惠,尤其旗下中航工業(232)同中航科工(2357)。中航科工係港股中唯一經營航空高科技軍民通用產品同服務,該股周一升穿10天線,可留意。十月變數多,宜防守為主,短炒轉身要快。

割柑人

關心你飯碗,貼近你生活,即Like「蘋果ATM」FB專頁!
BannerBanner