【智取大市】有疫情就有升市 - 晉佳

更新時間 (HKT): 2020.10.09 00:45
■抗疫股港視噚日拗腰破今個星期高位,全日升11%,壞消息震倉已完。 資料圖片

近期美股同港股強勢,可以歸功於武肺疫情再度升溫,同埋美國FDA不受制於特朗普,按部就班推出疫苗(雖然小弟認為係雙方扯貓尾嘅結果),美國再因應疫情同疫苗進度未如預期而加大放水,對市場嚟講絕非壞事。

早兩日特朗普拉倒新一輪刺激經濟措施嘅談判,市場借機急回,但周三道指再回升530點收復失地。傳美國對支付寶同微信支付交易設限,壞消息對阿里(9988)股價影響同樣稍瞬即逝。任何壞消息都成為撈貨機會,買需相當強。

美股裏面嘅抗疫概念股由Zoom先行破頂,早排Twilio配合收入數據勝預期而爆升創新高,最新有Fastly單日急升兩成,大半個月已升五成,緊接落嚟,仲有Cloudflare、Zscaler等等仲未大成交破頂。觀乎Zoom破完頂隨即進入整固,睇嚟未買破頂嘅抗疫概念股,好過高追已爆升股。

港股嘅抗疫股選擇走唔甩港視(1137),周初本來反彈好地地,點知早兩日公佈HKTVmall 9月GMV按月跌11%,拖累股價星期三單日一度急挫9%,點知噚日就拗腰破埋今個星期高位,全日升11%,壞消息震倉已完。按照資金重新掃上美國抗疫概念股嘅套路,後市破頂阻力不大。

晉佳

fb.com/advanceguy1

關心你飯碗,貼近你生活,即Like「蘋果ATM」FB專頁!
BannerBanner