【笑到最後】保衞資產買台積電 - 高明

更新時間 (HKT): 2020.10.12 02:00
■買台積電,繼續冇目標價,揸到2024年!

8月30日,本欄推介台積電(TSM),當時股價79.25美元,上周五收報88.79美元,上升12%,同期納指跌緊1.7%。

有乜嘢好得過股價上升?就係唔使點捱之下股價上升。成個9月跌浪,高估值科技股跌到喊,同期台積電基本上橫行,最低都只係77美元左右,冇跟跌浪一齊跌。因為台積電喺半導體板塊之中,估值相對最平,甚至仲低過中國巨大晶片企業中芯(981),而台積電嘅技術係全行最高,變相喺呢個跌浪之中防守力最強。

蘋果、AMD呢啲企業搵台積電做代工,爆產能就唔在講,上次講到,因為競爭對手三星有做消費產品,做代工有利益衝突,台積電純粹做代工較着數。最近有傳Nvidia新顯示卡RTX 30系列,本身採用三星做代工,到2021年就會轉用台積電7納米製程。做綜合企業定係代工,本身各有各好,但現時股市比較獎勵業務集中嘅公司。

今年咁啱唔同產品都出新款,所以晶片先至咁搶手,例如蘋果將會出iPhone 12、Nvidia同AMD各自有新產品推出、Xbox Series X同PlayStation 5又一齊出,加上在家工作,焗住要買部新機,所以令台積電做唔停手。嚟緊幾年會唔會一樣咁好數?就要睇啲產品好唔好賣,初步睇Nvidia嘅顯示卡同PS5賣到有炒價,估計iPhone 12推出,都會大賣。

但台積電真正成功嘅源頭唔係人哋啲機幾好賣,而係鄧小平嗰句:親美會發達。台灣親美,台積電直接成為接美國定單最受惠股。身處香港,喺一個普通人控制唔到嘅範圍,冇跟到鄧氏發達方程式,唔單只令我哋冇得簡單發達,資產價值隨時不保,惟有將控制到嘅資產盡量接軌,就係買台積電,繼續冇目標價,揸到2024年!

高明

fb.com/bigricetea

關心你飯碗,貼近你生活,即Like「蘋果ATM」FB專頁!
BannerBanner