【異動空間】人仔升到阿爺慌? - 魏力

更新時間 (HKT): 2020.10.12 02:00
■人仔創一年半新高,強到阿爺要出招遏止升勢。資料圖片

股市角度去睇,「十月驚奇」暫時應改為「十月驚喜」,特朗普中肺炎令市場驚一驚後,就換來連日升市。拜登民調大幅領先,市場認為係好消息;兩黨就刺激方案爭拗不斷,投資者當耍花槍,繼續買貨等握手言和。

上周更有經濟研究機構認為,無論邊個勝選,股市都會升!點解?因為消除不明朗因素,白宮可集中精力振興經濟,加快復蘇步伐。更重要係,美國經濟已衰無可衰,疫苗面世後,明年中將可控制疫情,推動經濟重新出發,逐步推高通脹,令風險資產(股票)繼續造好 !魏力認為,講到尾都係資金泛濫,只要無大鑊嘢爆,音樂椅遊戲就繼續,戰友落場無問題,但切忌深入敵陣,在逃生門附近博殺就算,撤退時都可快人一步。

擔憂通脹令銀紙貶值,美滙指數上日急插0.6%,失守20天線再次尋底,下方支持位於92.8水平;人仔跌穿6.7大關(意味升值),創一年半新高,強到阿爺要周末出招,遏止人仔升勢。人行宣佈12日起,將遠期售滙業務的外滙風險準備金率由20%降至0%。

有何啟示?該措施意味降低購滙成本,鼓勵企業購買外幣(例如美元),中期而言將增加人仔的沽售壓力。而以往內銀每做一單遠期購滙,就會有一筆美金被央行凍結,變相增加銀行的成本(亦即客戶成本),如今準備金歸零,有助降低企業購滙成本,也可說是對內銀的雪中送炭。

魏力

fb.com/2012jason

關心你飯碗,貼近你生活,即Like「蘋果ATM」FB專頁!
BannerBanner