【智取大市】A股大戶唔騷林鄭 - 晉佳

更新時間 (HKT): 2020.10.16 00:45
■林鄭前仆後繼做定契弟,將自己地盤矮化再政治all in,精明嘅A股投資者睬佢都傻。資料圖片

習近平選擇五中全會之前南下深圳搞大龍鳳,越係想會前立威,越顯示內部信心不足,所以先要選擇喺會前強勢維穩。林鄭前仆後繼做定契弟,將自己地盤矮化再政治all in,精明嘅A股投資者就睬你都儍,睇定形勢先算,至少A股只幫習主席立威一兩日咁大把而已。

之前話搞國企統戰民企,外間劣評如潮,𠵱家又話民企主導嘅深圳做大佬加大開放,一時一樣邊套先係啱?係雙軌制定係朝令夕改?莫非未來係想將上海定位為中央主導,深圳變市場主導?一切未有答案,未大手押注似乎上策。

港美股齊齊進入調整,近期強勢科技股出現沽壓,疫情受惠嘅Cloudflare、Fastly等等升勢已多,紛紛回吐,即使後市繼續升,亦應當另覓他選。香港炒智能家電概念,JS環球生活(1691)同海信(921)齊齊起動,固然係唔錯選擇,美股嘅話亦可以留意iRobot,近期創今年高位,穩步上揚。

iRobot主要產銷掃地機械人,是高價路線,疫情底下表現唔錯,今年第二季收入升8%,第二季非GAAP每股盈利1.06美元,按年升1.2倍,年度化市盈率21倍,有智能家電概念,長遠相信唔會係呢個價。

晉佳

fb.com/advanceguy1

關心你飯碗,貼近你生活,即Like「蘋果ATM」FB專頁!
BannerBanner