【智取大市】博A股破位值得坐貨 - 晉佳

更新時間 (HKT): 2020.10.19 02:00
■人民銀行取消遠期售滙嘅外滙風險準備金率,係對金融市場中短期信心滿滿嘅表現。 資料圖片

對於股市嚟講,近期可以話有連環好消息。首先,一個星期前,人民銀行取消遠期售滙嘅外滙風險準備金率,即係中央唔驚人民幣貶值,由得你沽,更歡迎你沽,因為唔想升得咁快,係對金融市場中短期信心滿滿嘅表現。

跟住上星期又傳內銀股第三季盈利跌幅將會「被收窄」,好明顯覺得中期金融系統風險有跌無升,喺呢個前提之下,股市相信亦唔會出現大跌風險。

滬深300指數由7月中到𠵱家,3個月左右喺高位形成一個長方形走勢,而安碩A50就已經提前破位,A股ETF似乎係短線穩陣之選。內銀股近日急升,假如博A股突破長方形嘅話,券商股應該有權接力,最值得留意係美國上市嘅富途,今年第二季經調整純利按年升3.1倍至2.43億港幣,收入升165%,計返年度化市賬率12倍左右,高增長新經濟券商股,論螞蟻集團影子股,其實佢最似。

與此同時,最近個幾月納指反彈幅度已經超越9月大跌市嘅0.618倍,換句話說,可以將9月跌市陰霾當粉筆字抹咗佢。納指升近9月初高位,全人類都𥄫實納指會唔會再破頂,當買大細咁買,似乎係破頂機會偏高。假如坐住貨,似乎唔使心大心細,嚟緊坐定定應該冇乜錯。

晉佳

fb.com/advanceguy1

關心你飯碗,貼近你生活,即Like「蘋果ATM」FB專頁!
BannerBanner