【操盤手札記】中美的本土優先 - 割柑人

更新時間 (HKT): 2020.10.20 02:00
■食正新能源汽車先機嘅比亞迪,上周上調首3季盈利預測。 互聯網圖片

大選臨近,例爆醜聞!距離美國大選約半個月,上周《紐約郵報》披露拜登兒子亨特電郵,涉嫌倚仗父親之名,喺同烏克蘭、中國嘅生意謀利。美國大選年,常有「十月驚奇」,例如1968年、1972年尼克遜「越戰門」、1980年列根「伊朗門」、2016年希拉莉「電郵門」等。「十月驚奇」爆出嘅料,又未必扭轉到選情。

據《路透》民調,拜登喺「通烏門」事件後,支持率仍領先特朗普10個百分點。不過,民調唔一定準,希拉莉就係人辦。拜登喺大選衝刺之際,突然由支持全球化轉軚支持美國製造,撞正特朗普嘅美國優先。點解?關肺疫事!疫情之下百業蕭條,優先照顧本土經濟,推動內部需求、重組供應鏈,成為全球趨勢。

事實上,中國5月中起講嘅「內循環」經濟模式亦然,都係應對疫情同全球格局變化。講到「內循環」,習近平喺8月尾一場座談會,已悄然改稱「國民經濟循環」,但都係內部需求優先啦!

上周習近平南巡,為下周嘅五中全會熱身,其間再提「國內大循環為主體」嘅新發展格局,相信會喺五中納入「十四五」規劃。當中,唔只涉及擴大內需,仲有提升產業鏈現代化水平。「十四五」焦點,勢必落喺推動「中國製造」走向「中國智能製造」嘅產業政策。

受惠產業離唔開新基建,如訊息同互聯網基建、新能源汽車等。食正新能源汽車先機嘅比亞迪(1211),上周上調首3季盈利預測,又入股晶片廠深圳華大北斗。比亞迪喺「刀片電池」車型熱賣同分拆半導體業務等利好消息下,已累積唔少升幅,近日調整,周一收128.4元,跌0.9%,可候回至20天線吸納。

割柑人

關心你飯碗,貼近你生活,即Like「蘋果ATM」FB專頁!
BannerBanner