【智取大市】國泰攬炒員工股東 - 晉佳

更新時間 (HKT): 2020.10.23 02:00
■疫情過後,國泰收入因為商務客大減,員工數目又大減,規模細咗,留低嘅員工及股東,好難成為贏家。 資料圖片

一場疫情令全球經濟大洗牌,老細終於發現員工可以用Zoom唔使搭飛機,可以cut成本之餘,又提升效率。

提升效率之後,輸家必然係航空界。國泰(293)減8,500個職位之中,香港裁5,300人,海外裁600個,之前關閉美國同溫哥華基地,真正裁員數目介乎6,300至8,500人。今次重組開支22億當中,絕大部份用作裁員賠償,每位被裁員工涉及重組開支平均介乎26萬至35萬元之間。

假設係一個年資淺嘅員工,1個月代通知金、1個月人工嘅補償金同埋遣散費(冇強積金對沖,假設做夠3年),再退返約個半月無薪假金額,走就至少拎走舊年嘅3個月人工,但留低就俾人cut人工,真係矛盾大作戰。

國泰拎完273億元之後,掟出22億元嘅重組開支,相比最基本炒人1個月代通知金同埋以強積金對沖嘅遣散費,估計嘔多十幾億出嚟。經過裁員同現役員工嘅新制之後,可以慳返每個月5億元。疫情過後,國泰收入因為商務客大減,同時員工數目又大減之下,規模細咗,疫情過後,股價要返去疫情前嘅9至10元水平,似乎已經冇可能了。留得低喺國泰嘅員工、股東,從金錢角度的確好難成為贏家。

晉佳

fb.com/advanceguy1

關心你飯碗,貼近你生活,即Like「蘋果ATM」FB專頁!
BannerBanner