BizStarter|「長實樓神」子趙朗棄投行創業:想像唔到40年都喺地產界

更新時間 (HKT): 2020.11.02 00:00

提到香港最賺錢行業,地產及金融業依然是主導,要以創新科技賺錢絕不是易事,前投行主管、長實「樓神」趙國雄兒子趙朗(Ronald),放棄高薪厚職投身創科行業,最近趁疫情研發企業管理軟件,打通零售業後台系統,希望半年內獲得2,500客戶。

33歲的趙朗2016年創立Atalon Ventures,首先推出數碼投杯球機枱PONGConnect,推動酒吧消遣活動投杯球(Beer Pong),吸引酒吧及會所客戶。惟面世後兩年,見及武漢肺炎打擊本港經濟,公司耗資逾約2,000萬元研發新產品—iSaleConnect,主打中小企客戶,期望利用科技改變舊有的營商手法,助商家拓展商機。

iSaleConnect有別於傳統的銷售點系統(Point of Sale),是一個智能營商系統,為企業提供一站式商店管理,功能不局限於最基本的落單系統,還可提供送遞服務、庫存管理、網購平台、報表分析等。

耗逾千萬研營商系統

趙朗接受《蘋果》專訪時解釋,疫情期間不少店舖要由堂食轉型至外賣,透過應用iSaleConnect可一站式解決整個外賣程序,包括提供網上落單平台、支付系統並連接已洽談合作的送遞公司順豐及GOGOX(前稱GOGOVAN);iSaleConnect除了餐飲管理亦有零售管理系統,可應用於各行各業,而其中一個最重要的功能,是結合O2O(Online to Offline)模式,為客戶設立網上商店,利用科技幫客戶主動營商。

不過,許多中小企早已有自己一套銷售點系統,未必要應用「智能營商系統」,趙朗胸有成竹地說:「我哋做創新就係我比一個你唔覺得自己需要嘅產品你,但係用咗之後就會覺得呢樣嘢係幫到你。短期目標希望喺6月個月內喺香港有2,500個客戶,一年內希望有過萬個客戶。我哋想將香港做一個試點,產品做得更加完善之後,就將呢個已經發揮到淋漓盡緻嘅product推畀代理,由佢去放喺唔同國家度用。」

耗資千萬元研發產品,趙朗坦言沒有刻意考慮收支平衡,他稱:「我哋想幫一啲普羅大眾,將佢嘅商舖轉型變做智能化。好多中小企唔會整企業管理軟件,我哋想以好affordable嘅價錢畀中小企用。」

話雖如此,但長和系有些零售網點,iSaleConnect與屈臣氏集團會否有合作機會?趙朗沒有否定可能性,但就指大企業自然有自己的解決方案,「我哋唔想tailor made一啲software system畀大企業用,因為嗰個市場已經有好多好大嘅競爭對手。好多時一啲數碼管理軟件淨係大企業受惠,中小企就stuck咗喺80、90年代嘅營商手法到。」

他更不諱言,自己提倡推出產品免費供企業使用,但要考慮其他董事的意見之餘,執行上也有難度,例如沒有足夠人手支援龐大客戶群,因此公司以基本費用每月500元供商戶租用系統,並指Atalon Ventures會不斷完善系統及為商戶推出新功能。

專訪趙朗前,政府尚未放寬酒吧限聚安排。他本身在在港經營4間PONG酒吧,大受疫情影響,旗下PONGConnect業務正在萎縮。他期望可與政府磋商:「我哋係持牌又有衞生督導經理,我哋唔希望你愈係限制我哋,或者妖魔化咗酒吧界,咁只會逼咗啲人去underground,嗰啲仲難控制。」不過他指「一雞死,一雞鳴」,透露正與酒店及馬會洽談租出機台,而且快將成事。

不曾入長和系打工:「地產相對易做」

離開投行,踩入創科行業全因為想「自我增值」,記者多番問到有否想過加入長和系幫手,趙朗僅稱「我從來冇離開過地產界,地產呢樣嘢相對易做」,更直言地產界乏味而且容易上手,反觀香港科研人才嚴重不足,研發產品的挑戰及成功感遠較完成地產項目大。

他說:「如果而家有舊大資金比我,叫我做發展商可以立刻做到。我imagine唔到自己40年都喺地產界,地產唔係起樓就炒樓,做創科係自己去揼一個產品出嚟,見到有人用你嘅產品,嗰種感覺係比我喺地產一個project賺10幾億嘅感覺充實好多。」

雖然目前工作與地產似乎沾不上邊,但貴為「樓神」之子,對樓市固然有一番見解,他認為現階段或許是投資「磚頭」好時機,其中認為工商舖已是低位。「如果你有能力供,(而家買)我覺得係冇問題,永遠喺下一個浪望返今日都係平。」自國安法刊憲後,移民聲音此起彼落,在港置業仍然可取?趙朗不徐不疾:「我覺得香港會繼續好、根基好好、經濟好好、稅制相對簡單,好多人鍾意喺香港做生意。香港人好創新、質素好好,我長遠睇好香港嘅發展,變相地產好難會斷崖式跌落去。」

趙朗年過而立,會否也趁機投資「磚頭」,他則笑言目前仍享有首置優惠。記者提起他早年說過要等結婚才置業,到底何時「封盤」?他透露已經有一位親密「伴侶」,「我搵咗個女朋友叫iSaleConnect,而家晚晚都同佢好close,八號風球我都喺公司開會,都係專注事業先。」

-----------------------------

掌握理財智慧 感受生活品味

investMAN全新網頁 優雅登場

-----------------------------

部署退休 輕鬆達至財務自由

點擊即睇《退休理財天書》

-----------------------------

【全球樓行】 Dream House零距離

屬於香港人的移民攻略

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

關心你飯碗,貼近你生活,即Like「蘋果ATM」FB專頁!
BannerBanner