【智取大市】Zigzag市撈好過追 - 晉佳

更新時間 (HKT): 2020.11.02 02:00
■受惠疫情令雲端以至數據中心需求上升,Inphi單季收入勁升近1倍,令股價爆升。 互聯網圖片

市場怕拜登一旦勝選後,特朗普會搞乜出人意表嘅嘢,加上疫情升溫,令美股避險情緒升溫。喺無限量寬防止市場出現類似3月嘅系統性危機之下,跌市唔會好似3月咁急咁深,而大選陰霾自然會因應進入大選周而逐步釋除,所以暫時估計美股進入zigzag市況,多過單邊跌市,當然持貨要預咗能抵受到近期波動性。

至於早已跑出嘅科技股,估值天花板已見,相信嚟緊會跟隨指數大波幅上落,普遍會變成賭大市嘅工具,撈好過追。

近期少有強勢嘅雲端概念股有Inphi,皆因公佈季績後爆升,單日成交佔市值接近四分之一,一下子貨落強者。受惠疫情令雲端以至數據中心需求上升,令單季收入勁升近1倍,遠遠跑贏數據中心行業增長,並且開始錄得經營利潤,其間唔計銷貨成本嘅經營成本上升幅度唔夠五成,收入增長快過成本,絕對係好兆頭,未來仍然享有經營槓桿,刺激業績轉盈之後再大幅增長。

由於Inphi開發嘅產品係尖端質素、傳輸速度高嘅數據中心硬件產品,所以仍然享有高毛利,達到五成以上,概念同NVIDIA相近,但好處係產品唔受晶片戰影響。Inphi市銷率大約10倍,雖然硬件股唔會享有軟件股嗰種高估值,但仍然係唔錯選擇。

晉佳

fb.com/advanceguy1

關心你飯碗,貼近你生活,即Like「蘋果ATM」FB專頁!
BannerBanner