【操盤手札記】後疫情逆轉勝之選 - 割柑人

更新時間 (HKT): 2020.11.03 02:00
■國策推動在線醫療,阿里健康食正條水,作為阿里系大健康業務唯一旗艦平台,值得憧憬。 互聯網圖片

五中全會上周四閉幕,落實「十四五」規劃,公報洋洋6,000幾字,多為口號式大方向。簡單嚟講,喺經濟上有「三提」、「三不提」。三個提到嘅重點係科技創新、新型製造業、內需為主嘅雙循環;三個冇提到嘅係經濟增長目標、房地產、金融。

揀股趨吉避凶,可參考下。本周繼續好戲連場,周二上演美國大選,周四上演螞蟻集團(6688)上市、阿里巴巴(9988)放榜。美國大選預咗亂局,美股難免波動。至於螞蟻上市,恒指公司上周五修例,螞蟻最快月中可入國指、科指、綜指,加上可入富時、MSCI指數,被動資金追貨,條數都幾襟計。持有32%螞蟻股權嘅阿里,喺螞蟻上市同日放榜,市場估計上季Non-GAAP按年多賺兩成。

螞蟻雖未掛牌,場外交易已錄35%升幅。阿里市值8,240億美元,螞蟻估值3,135億美元,阿里持股約值1,000億美元,佔其市值12%。照計螞蟻每升10%,阿里可升1.2%;不過,都要睇其他因素。

周一,喺中國製造業PMI好過預期下,中港股市回升。恒指反彈1.5%,收24460,日線圖呈「身懷六甲」待變形態,短線需升穿上周五大陰燭頂24600始轉好。外圍除咗有美國大選憂慮,仲有歐美疫情憂慮,風險重重。中國雖已走出疫情陰霾,但喺後疫情時代,在線醫療方興未艾。從事醫藥電商、在線問診等嘅阿里健康(241),上周一發盈喜,預計中期至少賺2億元人民幣。銀碼唔大,但扭虧為盈意義重大。

國策推動在線醫療,上年底更開放線上處方藥銷售,阿里健康食正條水,作為阿里系大健康業務唯一旗艦平台,值得憧憬。該股現價20.3元,中金目標價28元,摩通更睇29元。

割柑人

關心你飯碗,貼近你生活,即Like「蘋果ATM」FB專頁!
BannerBanner