Boss Talk|審計文件涉「國家機密」禁出境 公會理事鄭中正:核數師成三煞位 入行以嚟最艱難

更新時間 (HKT): 2020.11.05 00:04

屋漏偏逢連夜雨,「武漢肺炎」疫情成為今年的黑天鵝,再加上中美的政經矛盾,衝擊各行各業,會計界當然亦受牽連。香港會計師公會理事、國衛會計師事務所主席鄭中正坦言,於中美角力戰下,會計界成「三煞位」。他特別提到,不少中國企業會計底稿,因被定性為國家機密,不能離境;但香港核數師因疫情亦未能北上,結果未能完成審計工作,坦言「而家嘅情況係我入行以嚟最艱難,因為我哋係做唔到我哋要做嘅工作。」

核數師要完成審計工作,必須進行實地考察,不過疫情下難以離境,鄭中正指出,「做唔到咁咪惟有依賴成員所、聯營所喺當地幫我哋做,但唔係十分理想㗎。」事實上,大量公司因受疫情影響,須押後披露經審計年報,早前亦有調查指出,年內有近三成上市公司未發業績。他表示,今年4月與監管機構多次磋商後,有關方面終容許受疫情影響上市公司,即使未能發出經審核的核數師報告亦不用停牌,「雖然都出左啲指引去紓緩情況,但長遠如果再做唔到,真係唔係好掂。」

審計文件涉「國家機密」禁離境

「唔掂」背後,其實與中美角力有關。核數師為中國企業審核期間,不時會接觸機密資料,「國內嘅工作底稿,係唔可以攞嚟香港,因為裏面好多國家機密唔畀你攞出嚟。」因此,要審核較為敏感的資料,就必須北上;但一場疫症令核數師未能出差,但同時,底稿亦不能離境,「貿易戰之前本來傾緊啲機制,原本諗住可以傾到嘅,但因為中美角力,講到去兩國關係,再加埋國家安全呀,咁你更加係冇可能攞出嚟㗎。」

鄭中正無奈表示,「比如話有公司想去美國上市,咁你唔畀佢拎個底稿,咁你點樣上市?所以差唔多冇乜公司喺美國上,上咗都回流啦,阿里巴巴嗰啲全部都返嚟。」他續指,核數師一方面要向監管機構提交底稿,否則面臨「釘牌風險」,另一方面又要遵從中國法律,「而家解決方式係監管機構對監管機構,我哋就最慘,卡喺中間,但佢哋都未傾掂呢件事。」

為「專業試風波」解畫 「安排到已係奇蹟」

一場肺炎激起千重浪,早前業界更引發一場「專業試風波」。每半年一次的香港會計師公會專業資格考試,今年6月試期因疫情取消,其後公會公佈,擬將原本12月舉行之考試,提前於11月底舉行,一旦屆時再爆發疫情,仍有12月甚至1月作後備試期。惟由於稅務局同時將報稅期限延至11月尾,審計高峯期撞正考試,惹來部份業界人士大力反對,最終公會決定將考試回復在12月舉行。

同為公會專業資格監督委員會主席的鄭中正表示,「初時好多反對聲音,話點解你搞啲咁嘅嘢?係咪卡住我啲人去晒考試冇人做嘢?」他解釋,今年只餘一場考試,實事在必行,「如果你唔考試,上面啲人升唔到,下面嘅人都上唔到嚟,你可以想像成年都冇會計師出產,對業界好大影響。」他又指出,由於考生超過1.5萬人,過往的考場亞洲博覽館因已成社區治療設施未能使用,遂要打散考場至不同學校、酒店等,同時又要配合考評局要求,「過程過五關斬六將,其實我哋安排到,本身已經係近乎奇蹟。」

將爭取再連任公會理事

面對批評,鄭中正表示,自己於公會連任10年,為年資最長理事,「我都睇得真係好透。有提議拎出嚟傾係件好事嚟,尤其是(公會理事)選舉將近,大家都想知道你會幫會員做啲乜嘢。但係真係要為咗會員福祉,如果係要嚟炒作,就唔好搞啦,因為呢個係考試嚟㗎。考試係神聖嘅,唔好攞嚟做政治籌碼。」

他表示,今年會繼續出戰公會理事選舉。今日香港,非藍即黃,訪問中他多次強調自己是走「中間路線」的「改革派」。現時理事會共20名理事,其中政府官員、政府委任加上「四大」代表,共有10人,另有6名為泛民,餘下為「改革派」,「政治係冇得中間路線㗎喇,但專業嚟講我覺得係可以,因為我哋真係以專業作為出發點。」

記者:財經組

-----------------------------

掌握理財智慧 感受生活品味

investMAN全新網頁 優雅登場

-----------------------------

部署退休 輕鬆達至財務自由

點擊即睇《退休理財天書》

-----------------------------

【全球樓行】 Dream House零距離

屬於香港人的移民攻略

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

關心你飯碗,貼近你生活,即Like「蘋果ATM」FB專頁!
BannerBanner