【智取大市】尋找落後當炒概念 - 晉佳

更新時間 (HKT): 2020.11.06 02:00
■電動車股表現強勁,可以留意吓周邊概念股,當中仍有落後選擇。資料圖片

一踏入美國大選,呢幾日唔理邊個領先,環球股市都一支箭向上,單計標普500指數,短短3個交易日收復咗10月下半月跌市嘅大約75%跌幅,證明之前嘅大選恐慌其實係多餘,市場又成功製造一次震倉。唔理特朗普定拜登做總統,參眾兩院仍由兩黨分別把持,即使拜登上場要推加稅方案仍然有一定阻力,於是連科技股都大幅反彈。至於新一輪救市方案,無論兩黨幾大分歧,最終都一定會通過。

大反彈過後,之後就平常心去睇原本預測嘅zigzag市況。焦點電動車股比亞迪(1211)升到近190元相當強勁,望吓周邊概念股仍有追落後選擇。建滔積層板(1888)主要產銷覆銅面板,除一般電子產品外,亦會用喺5G基建同埋電動車鋰離子電池,其中後兩者係發展大趨勢。近期電動車鋰離子電池需求大增,推升覆銅面板價格。

目前建滔板估值相當於業績高峯期2016年、2017年盈利計嘅市盈率10倍左右,少許增長同當炒概念下,算係唔貴。股價自從10月12日大成交急升13%之後,港股進入跌勢,但其股價一直橫行,成交縮小,似等候下一波升勢,可博11月內挑戰2018年高位,大約14.4元。

晉佳

fb.com/advanceguy1

關心你飯碗,貼近你生活,即Like「蘋果ATM」FB專頁!
BannerBanner