【魚樂無窮】鬥追落後吼呢隻 - 唐牛

更新時間 (HKT): 2020.11.10 02:00
■航運及物流股近期大旺,中外運現價市盈率6倍,股息率達5厘,以落後股來說絕對超值。 互聯網圖片

拜登宣佈當選美國下任總統,雖然特朗普講明要訴諸法律,但市場資金懶理,全部喪炒拜登繼任,新經濟股破頂的同時,舊經濟股亦起動,炒嘅主要係中美貿易戰降溫概念,你見華為概念股、中興(763)、中芯(981)全部落鑊就知。

現階段最苦惱嘅,當然係之前驚大選而減倉甚至清倉嘅戰友,高追又驚出事,唔追又怕蝕底。但拉闊少少個畫面睇,又唔需要咁sad。以我自己為例,事先張揚輕倉上陣,雖然今次唔能夠贏大鑊,但自己倉位只需向自己負責,一早計好數今年回報達標,所以今轉有進賬便心滿意足了。

至於嚟緊部署,中線目標依然係新經濟股及內需股,原因不再重複,高追無謂,唯有等待震盪加倉,短炒嘅要吼實市場資金。好似近期大旺的航運及物流股,陽燭一棍接住一棍,絕對值得尊重。主打物流及貨運代理嘅中外運(598),首3季盈利下跌1.7%,但單計第3季則增長44%,復蘇勢頭顯現。講估值,現價市盈率6倍,股息率達5厘,以落後股來說絕對超值。從周線圖出發,股價倘突破年初高位2.8元,下一站可見3.5元,跌穿100天線2.36止蝕。當你發現普遍航運股9RSI全部炒到90幾極超買,中外運仍在83,短炒仲有水位可衝。

唐牛

http://fb.com/tongcow88

關心你飯碗,貼近你生活,即Like「蘋果ATM」FB專頁!
BannerBanner