【智取大市】輝瑞變股市衝擊波 - 晉佳

更新時間 (HKT): 2020.11.11 02:00
■肺炎疫苗需要喺零下80度左右溫度下儲存,冷鏈醫療物流股CYRX,股價受消息刺激而大升。 互聯網圖片

輝瑞疫苗對市場嘅震撼力,似乎不遜於拜登當選總統。

本欄近幾個月反覆提過好幾次,當疫苗誕生,實體經濟以至樓市都會開始向股市競爭資金,與此同時美國量寬嘅規模亦好可能減少,對於整體股市利淡多過利好。當疫苗消息成為振奮市場嘅消息時,掉返轉減持或許冇乜錯。

資金一下子蜂擁疫情受累股博翻生,自然要從新經濟股抽資,科技股隨即裂口低開。隔晚美股,雲端、宅經濟股猶如股災,已知唔對路,但勢估唔到,美團(3690)旅遊業務明明可受惠疫情好轉,但市傳市監局提出平台經濟領域嘅反壟斷指南,令股價跌得咁慘烈,亦反映資金流向凌駕實際基本因素。事實上,股價300蚊樓上亦已充份反映利好因素。美團股價單日急跌一成,都係史上第五高嘅收市價,今個星期嘅低位,其實係上星期嘅高位。如趁調整入貨,就要考慮上述疫苗誕生嘅因素對呢隻新股王嘅衝擊有幾大。

最後update一下,輝瑞疫苗效力勝預期,但佢隻疫苗需要喺零下80度左右溫度下儲存,令物流難度大增,之前推介過嘅冷鏈醫療物流股CYRX,股價因消息大升。根據報道,佢正在參與生產可以透過網上監測溫度嘅溫度計,喺運送疫苗過程中使用,而高層喺季績度亦提到,新收購MVE嘅低溫儲存設備亦因應武肺而接獲幾張政府定單,會唔會進一步受惠?值得留意。

晉佳

fb.com/advanceguy1

關心你飯碗,貼近你生活,即Like「蘋果ATM」FB專頁!
BannerBanner