【智取大市】生科股滄海遺珠 - 晉佳

更新時間 (HKT): 2020.11.13 02:00
■榮昌生物有自主開發能力,有膽喺螞蟻同期招股上市,係近期唯一較可取嘅半新生科技股選擇。 互聯網圖片

近期相當多立立雜雜嘅生科股上市,當中唔少講到幾優質都好,都只係威得嗰個暗盤時段,一上市即刻見光死。揀選生科股,點都要做吓功課,首先睇吓佢有冇自主開發能力,近期已上市同將會上市嘅生科股裏面,大部份都係同海外合作夥伴共同研發攻大陸市場,有啲本身主打藥嘅市場都不太juicy,亦有啲主打藥本身市場唔係咁大,亦有啲海外夥伴本身喺美股都係低市值兼股價死吓死吓,遇正呢類股,基本上可以不理,估計上市後長期潛水。

比較唔同嘅係榮昌生物(9995)同藥明巨諾(2126),後者唔使講,CAR-T、藥明系、低市值,即使主打藥攻嘅市場規模細,但揸住3個賣點一樣炒得起,但長線純粹炒味濃。

榮昌生物有自主開發能力,創新藥泰它西普RC18主要醫治系統性紅斑狼瘡症、類風濕關節炎等,安全性獲肯定;RC48主要醫治胃癌、乳腺癌,喺中國進入臨床三期試驗或提交中國藥監局,亦獲得美國FDA突破性療法認定,獲得快速通道資格。市值320億左右,有膽喺螞蟻同期招股上市,可以話係近期唯一較可取嘅半新生科技股選擇,質素絕非嘉和生物(6998)、先聲藥業(2096)之流可以比較。

晉佳

fb.com/advanceguy1

關心你飯碗,貼近你生活,即Like「蘋果ATM」FB專頁!
BannerBanner