笑到最後|疫苗不會篤爆科技股泡沫(高明)

更新時間 (HKT): 2020.11.15 17:28

大家有冇留意,不論華文定英文傳媒,9月到依家,不斷有人唱美股太貴、2000年科網泡沫翻版、美國人都唔買美股、FAANG已經冇人用、沽貨沽貨沽貨!

最新一個沽貨理由,就係已經研發疫苗,工作模式會回到疫情之前,科技泡沫已經玩完,快啲沽貨,唔沽貨就笨。

係咪要沽貨呢?巴郡第三季業績嘅持倉推測,巴郡第三季出售大約40億美元的蘋果股票,但係同時第三季回購大約90億美元巴郡,今年頭三季回購157億美元巴郡,股神都加入美股回購推高股價嘅大家庭。當然,由買蘋果(AAPL)開始,到1956年投資福特以來首次買新股雪花(SNOW),再加上回購,一次又一次否定自己過去睇法,合理懷疑已經唔係佢決定,此乃後話。

疫情只係將原本嘅趨勢加速,iPad賣斷貨可以見證趨勢未有停止,起碼要執咗嘅連鎖店全面開返晒,先可以稱之為回到疫情前,但呢個可能性好低。如果要爆煲9月應該爆咗,唔會只係清洗淡倉之後買返上去。

就算冇疫情,今年下半年咁啱有一浪新產品周期,GeForce、PS 5、Xbox Series X、iPhone 12、Radeon等等,部份產品一推出有炒風,硬件連埋銷售數字起碼有兩季銷售數字憧憬,資金唔會突然間消失,好似巴郡咁有1,500億美元現金,錢太多搵嘢買,冇心水之下回購。

美股市場評論大概似幾年前嘅港樓,買家話好貴,評論話樓爆,有錢有貨嘅人都話唔值。之後發生咩事?就係樓價升咗上去。事實上,話一件資產貴,潛台詞係:「我想買,最好跌落去我心入面嘅價,等我任買,齊貨之後即刻升」,個個揸住啲錢等跌落嚟買。坊間大把嘢都好貴,點解冇人講?因為冇人想買。

科技股係咪泡沫?肯定係,但係印銀紙嘅量令到資金過剩,科技股現金多、有增長同埋出新產品有追捧,泊入去好過泊現金,就係咁簡單。正如今次病毒,就算有疫苗,以後有好大機會同病毒共存,泡沫都一樣,將來都要學習同泡沫共存。

高明

https://www.facebook.com/bigricetea

-----------------------------

掌握理財智慧 感受生活品味

investMAN全新網頁 優雅登場

-----------------------------

部署退休 輕鬆達至財務自由

點擊即睇《退休理財天書》

-----------------------------

【全球樓行】 Dream House零距離

屬於香港人的移民攻略

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

關心你飯碗,貼近你生活,即Like「蘋果ATM」FB專頁!
BannerBanner