【操盤手札記】數據中心大茶飯 - 割柑人

更新時間 (HKT): 2020.11.17 02:00
■萬國數據內地市場佔有率達21.9%,且處於增長期,今日公佈季績,不妨留意。 互聯網圖片

金融戰殺到!美國總統特朗普打緊大選官司之際,不忘對付中國,下令封殺31間中國企業,指有軍方背景,禁止美國人投資,被視為中美金融市場脫鈎之舉。白宮易主,會唔會變?唔好忘記,之前強制中概股除牌嘅《外國公司問責法》,係共和、民主兩黨議員一致通過嘅!

禁令涉及29隻港股,連三大電訊商都上榜。中移動(941)股東中,唔計母公司,五大機構投資者全屬美資;聯通(762)五大機構投資者亦全屬美資;至於中電信(728),五大機構投資者4間屬美資。睇返2018年美國制裁俄鋁(486),俄鋁7個交易日瀉七成,都咪話唔擔心。

上周五中移動、聯通、中電信分別跌5%、6.6%、7.8%,周一再跌3.7%、1.8%、4%,惟電訊股佔恒指比重唔大,影響有限。

恒指收26381,回升0.9%,短線上落格局,阻力位睇前浪頂26782,支持位睇前裂口底25799。惟恒指7個交易日4支陰燭,高開即有沽售,有派貨之嫌。

美國上市嘅中概股,已加快搵定後路。中國最大中立數據中心營運商萬國數據(9698),就剛喺月初來港第二上市。「十四五」規劃以「科技自立自強」作為國家發展嘅戰略支撐,數據中心係科技發展嘅根基,勢將加大投資,加上數據處理需求趨增,萬國數據可望分杯羹。

萬國數據客戶涵蓋雲服務商、網絡商等,包括阿里巴巴(9988)、騰訊(700)、華為等。據艾瑞諮詢數據,舊年中國數據中心服務市場總收入為334億元人民幣,營運商中立市場佔56.3%,預計2019至2024複合年增長率為31.8%。萬國數據內地市場佔有率達21.9%,且處於增長期,今日公佈季績,不妨留意。

割柑人

關心你飯碗,貼近你生活,即Like「蘋果ATM」FB專頁!
BannerBanner