【冰說聰明】北水聚焦兩隻新貴 - 青冰

更新時間 (HKT): 2020.11.19 02:00
■祖龍娛樂被納入科技指數,祖龍主業為手遊,是北水最愛,不妨吼實。互聯網圖片

恒指上周季檢,美團(3690)大熱勝出,安踏(2020)都算係熱門,冇乜驚喜,反而百威(1876)就以半冷姿態染藍,三隻新貴拍埋比較,前兩隻都在本月創歷史高位,現時染藍可謂錦上添花,再升的水位未必太多,而百威算是舊經濟股的一員,表現亦相近,莫講話係歷史高位,3個月高位都未到,所以牌面上百威係較值博。

而季檢的另一個看點,應該是科技指數的首次變動,加入明源雲(909)及祖龍娛樂(9990),兩者都係上市只有幾個月的半新股,明源雲已經倍升,祖龍在季檢前,剛創上市新低,不過比起招股價,仍有近4成的升幅。現時追蹤科技指數的ETF有6隻,基金規模加埋都只有百幾億元,相比起恒指及國指,係小巫見大巫。不過隨着科技指數期貨在下周一開始買賣,相信有助提高指數的認受性,嚟緊一月仲會有指數期權㖭,有齊這些配套,日後就會有齊牛熊窩輪炒。

雖然科指成份股變動未必會帶來龐大資金流,但恒指公司在上周亦同時宣佈,將明源雲及祖龍納入綜合指數,即係話兩股大有機會在12月7日加入港股通,滬深交易所將於當日前會有正式公佈。恒生綜合指數是半年才作一次檢討,公佈日期是每年的2月及8月,今次是根據快速納入基準而做的,有別於半年檢,今次不是加幾十隻,而只係加兩隻,換言之北水不需要花心思左揀右揀,目標只有兩個,火力都集中好多,再睇吓業務,一間做雲一間做手遊,都是北水最愛,戰友不妨吼實喇。

每季的指數檢討,或炒北水新貴,消息公佈後總會有裂口上升,但其實由公佈至正式生效,會有3個星期時間,首天立即衝入場追貨未必係好事,耐心等候回吐,搵個靚的入場位,才是上上之策。

青冰

fb.com/chingbing888

關心你飯碗,貼近你生活,即Like「蘋果ATM」FB專頁!
BannerBanner