蘋果驗樓|三姐妹送碧桂園馬鞍山泓碧給父母 驗樓師明哥:交樓質素不理想

更新時間 (HKT): 2020.11.20 00:00

楊氏這一家是典型的港人置業故事,由公屋換居屋,再由居屋換私樓。父母老了,三個女都嫁了,大姐和三妹搬到馬鞍山,4名兒孫是兩老的心肝寶貝,天天山長水遠由屯門到馬鞍山湊孫。二姐膝下無兒,與丈夫居於北角千萬單位,搵到錢又可負擔,為了父母不用舟車勞頓之苦,就把他們持有的屯門居屋賣掉套現300多萬元,換入馬鞍山新樓泓碧,買入價868萬元,每月2.7萬元供款由三姐妹支付,二姐供最多。鏡頭前是三妹,她說:「層樓係我哋幾姐妹送畀阿爸阿媽嘅。」鏡頭後的二姐則認為:「我覺得直頭自己畀首期,先係送,但無能為力呢!」

三妹說,就着這次換樓行動都傾過好多次,「父母嘅屯門居屋仲有兩年就供完,兩年後一勞永逸,但搬嚟呢度畀晒啲錢做首期,仲要每個月攞啲錢出嚟供樓,就喺呢個位。老人家都唔想我哋咁辛苦,所以都講過好多次。我哋不斷勸佢,話呢啲唔使佢哋操心,等我哋諗,同埋私樓會升值,咪當買磚頭儲錢囉,慢慢佢哋接受。直至收樓,睇到佢哋個樣都好滿意。」二姐補充:「其實佢哋講過好多次唔應該買,話有屯馬綫,但每日咁樣係非常之攰,享受兒孫生活都唔好咁操勞。」

其實都是用父母名義買樓吧?三妹坦言:「我哋收樓,經紀話畀我聽呢啲單位而家賣緊900幾萬,所以我哋話:『嘩!畀你叻極每個月儲3萬蚊,一年內點都追唔到一球!』而家暫時畀老人家安享晚年,長遠都係投資。」但馬鞍山新樓都好多選擇,何必以身試內房碧桂園在香港的第一個住宅項目?三妹回應:「可能有啲人聽到有啲大膽,但大陸發展商喺香港第一個樓盤,有機會做靚啲,打響頭炮。」最終她們以868萬元買入泓碧一個兩房單位,實用511方呎,呎價約1.7萬元,支付約3成首期,月供約2.7萬元。

單位本月收樓,他們最驚喜是景觀開揚,客廳和兩個睡房都望見八仙嶺,兼且看見觀音像,信佛的阿爸都好滿意。不過單位牆身油漆、大門、露台及浴室去水位就好似有問題,三妹最驚:「話畀我聽係咩入水樓,唔知邊度牆身空心呀。」那就交由資深驗樓師賴達明吧!

868萬單位12塊空心磚 睡房天花空鼓

明哥到埗,單位開門見廚房,但未講廚房先講門,事關大門門鼓太鬆,自動閂埋勁大力,明哥建議業主可以要求發展商調返緊門鼓。廚房來去水沒有問題,惟洗碗盆水龍未安裝穩固有鬆,更甚的是,地板及牆身石材就出事,崩裂到手摸到起級,絕非天然裂紋,而其中一塊地面石材的裂縫之間已白化,反映水氣入侵,石材病變。明哥建議更換地面一塊地磚,否則滲水到磚底,增加日後滲水風險。

打開露台門,門頂牆身敲一敲,清脆的空鼓聲衝入耳朵,不是一塊半塊,而是12塊之多,算是近期少見的問題,但相信與位處門頂鋪工太累了所致。浴室石材同樣差,洗手盆枱面石材有裂崩。四大扣分位之空鼓批盪亦於主人房天花牆角被發現,面積約2平方呎,明哥指,不符合標準,必須鏟底重鋪。

業主希望這家內地發展商的頭炮會是傑作,但明哥總結,單位瑕疵問題比較明顯,質素是麻麻地,「市場其他新樓單位空心磚、批盪空鼓已好少見。喺香港嚟講係唔理想,內地嚟講係可以接受。」

碧桂園香港營銷部回應,管理處已於11月13日收到業主之驗收報告,全部的執修包括更換安全玻璃已於11月15日完成,將安排與業主作最後驗收。此外,露台被指去水慢,經實測後,去水情況正常,因地台瓦面為粗糙面引致去水略為受阻而較慢去水。

歡迎讀者提供新樓單位予本報驗收,包括大埔朗濤、大埔天鑽、元朗山水盈,費用全免。有意者請把單位詳細資料,包括座數、樓層及室號,以及個人聯絡方法包括手機號碼,目前收樓情況即是否已取鎖匙或預計收樓日期,電郵至business@appledaily.com,註明「驗樓」。

-----------------------------

掌握理財智慧 感受生活品味

investMAN全新網頁 優雅登場

-----------------------------

部署退休 輕鬆達至財務自由

點擊即睇《退休理財天書》

-----------------------------

【全球樓行】 Dream House零距離

屬於香港人的移民攻略

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

關心你飯碗,貼近你生活,即Like「蘋果ATM」FB專頁!
BannerBanner