【智取大市】12月慎防跌市 - 晉佳

更新時間 (HKT): 2020.11.23 02:00
■美股上市嘅智能音箱生產商SONOS,估計疫後更上一層樓。資料圖片

踏入12月中國出口管制法出爐之前,今年嘅強勢股紛紛搶高,估計今個星期好友仍佔先,但去到12月特朗普將對華招數傾巢而出,中國亦隨時有反制行動,估計會構成市場震盪,加上美國疫苗推出,投資者慎防資金快將流入實體經濟,對股市不利。

憂慮資金由股市流出嘅同時,美銀美林嘅報告顯示,91%基金經理預期未來12個月經濟逐漸復蘇,股票增持至2018年1月以來最高比例,反映股市超買。12月牌面較不利股市,9月至今每個幾月股市就大跌一轉嘅趨勢難改,不妨趁月尾檢視持倉,非核心持股、只趁勢炒一浸升浪嘅股,可趁機沽出,減低風險,有幸能升至拋離5天線嘅股就可率先食糊。

個股當中,美股上市嘅智能音箱生產商SONOS呢個牌子,大家或許有聽過,呢間公司上星期公佈季績之後,單日搶高三成,原因係疫情至今首次錄得季度盈利,收入升15%反映業務擺脫疫情影響,雖然當中靠削減銷售開支同埋其他收入嚟提升盈利,恐防影響稍後銷售情況,但預期新一年度收入升11%至15%總算唔錯,預計疫後業績可穩定回升,智能音箱始終係新產品,SONOS亦有供應高端產品嘅能力,疫後估計更上一層樓,股價績後挑戰高位合理,後市遇上調整不妨吸納。

晉佳

fb.com/advanceguy1

關心你飯碗,貼近你生活,即Like「蘋果ATM」FB專頁!
BannerBanner