【智取大市】港樓變成「林鄭市」 - 晉佳

更新時間 (HKT): 2020.11.27 02:00
■林鄭大大聲話有31萬住宅供應,潛台詞係樓市將變成行政主導,一改大市場、小政府玩法。資料圖片

林鄭月娥今時今日拋出十年31萬住宅供應大計,篇幅水蛇春咁長,意氣風發,一改上年作風。以前《施政報告》拋出呢個大計只會覺得係假大空,𠵱家觀感同兩年前比較,確係完全不同。𠵱家立法會議員話DQ就DQ、選舉話延期就延期、律政司話告就告、話撤控就撤控,「明日大嶼」亦會話過就過,實在睇唔出所謂簡化發展程序、收地難度會更高,只要政治正確嘅話。「好打得」嘅林鄭可以講得咁大聲,證明佢有再次「打橫嚟」嘅準備同把握。

林鄭大大聲話有31萬住宅供應,到時真係會有31萬?唔一定,潛台詞係樓市將變成行政主導,一改大市場、小政府玩法,係31萬?21萬?定係11萬?就由政府去「宏觀調控」,有辣招再有埋控制供應,樓市背後就由中央話事。咁嘅情況下,你想佢大升,好難,想邊個去賺?亦由中央分餅,至少唔會係外資太古,太古呢類「小市場」嘅參與者,押注太多喺香港,實在難以「安心出行」。

不過,高樓價係唔需要變的,冇人想佢爆煲,中央亦唔需要令樓價低太多,因為未來自然可以有「優惠中資價」。總之利益集團想要保留嘅、係佢哋命脈嘅嘢,始終會留得住。

晉佳

fb.com/advanceguy1

關心你飯碗,貼近你生活,即Like「蘋果ATM」FB專頁!
BannerBanner