【智取大市】吼工業自動化概念 - 晉佳

更新時間 (HKT): 2020.11.30 02:00
■康耐視受惠未來工業自動化大趨勢,影像產品長遠需求殷切,如果美股稍後出現調整,康耐視會係低吸長揸嘅唔錯選擇。 互聯網圖片

美股周四感恩節假期休市,唞咗一日後嘅半日市就炒到癲,疫苗股成為電動車之後另一發癲板塊,部份未起動疫苗相關股仍可留意。

其他個股方面,工業用影像產品供應商康耐視(Cognex,CGNX)緩緩上升,受惠未來工業自動化大趨勢,影像產品長遠需求殷切,如果美股稍後出現調整,康耐視會係低吸長揸嘅唔錯選擇。

2019年康耐視業績倒退,進入低潮過後,上季收入喺疫情期間按年急升37%,每股盈利按年升96%,加上預測第四季收入1.9億至2.1億美元,即係至少回復返2018年第四季1.93億美元水平,證明低潮已過,料重拾穩定增長,股價目前重返2018年高位,相當合理。今年市盈率估計略低70倍,但明年受疫情打擊程度低過今年,相信盈利增幅明顯高過今年(預料超過一成)。同其他美股一樣估值不低,但長遠具持有價值。

港股方面,大陸醫療行業帶量採購擴闊至多項醫療耗材,10月心臟支架帶量採購文件出爐,市場憂慮會蔓延至骨科同眼科,醫療股上周齊齊受壓,百濟神州(6160)、信達生物(1801)、榮昌(9995)等等都無端端中箭,但百濟神州周五美股半日市急彈8%,相信市場短暫拋售已過,加上落實明年初北水可買B股,勢成為北水標的嘅榮昌可跟隨反彈,後市有力破頂。

晉佳

fb.com/advanceguy1

關心你飯碗,貼近你生活,即Like「蘋果ATM」FB專頁!
BannerBanner