【佬訊專欄】Zoom會議三招絕技 - 佬訊

更新時間 (HKT): 2020.12.01 02:00
■大部份會議都是在浪費生命,開會最緊要嘅其實係三隻字:存在感。資料圖片

第四波殺到埋嚟,開會又變番晒Zoom meeting,今日分享一些心得。

大部份會議都是在浪費生命,開會最緊要嘅其實係三隻字:存在感。要在Zoom meeting彰顯存在感,靠以下三點。

第一,一定要開cam。一般notebook的前置鏡頭都質素麻麻,所以記得盡量選擇有自然光的位置。冇自然光的話,可以去肥仔開倉買支打燈,據聞效果也不錯。

穿搭方面,最好是穿一件衫領無變形的淨色t-shirt,身旁放件裇衫,再放件西裝褸。入會時先不要開cam,觀察吓其他人的着法再決定。開cam後,間中點頭、微笑、大笑,做手勢,就是代表你attend to the meeting嘅第一步。

第二,把握機會插嘴。尤其年紀有咁上下的同事,很多時連開咪都唔識,講嘢時要不無聲就細聲,甚至插唔實咪而窒窒吓。這時,你就要先聲奪人,立即unmute:「唔好意思呀Mary,你個邊好似唔係好清,可唔可以由xxxx個度講多次?」老闆同事覺得你專心,立即加分。

最後,是善用text chat。無得插嘴時,不妨試下係Zoom chat打兩句:「This xxx is a very good point!!」、「Nice idea Patrick!」等等。很多時其他人都在聽講者的話,見到message也不會特別call out你解釋,所以基本上是零風險但又可以顯示存在感的絕技。

散會之後,有心的可以再send一兩個email follow up吓。唔講住了,剛剛邊開會邊寫文,現在也要send番一兩個email補補數。

佬訊

http://fb.com/loshunhk/

關心你飯碗,貼近你生活,即Like「蘋果ATM」FB專頁!
BannerBanner