【笑到最後】真香港人中廿年降頭 - 高明

更新時間 (HKT): 2020.12.07 02:00
■香港某一代人會因為少數清華北大精英,而覺得所有內地生都是精英。

鄰欄股榮話留島不留真香港人,以及十年後中環再無真香港人。如果係公平競爭嘅結果,所有香港人都會服,但實情係,過去廿年香港人集體中降頭所致,可悲嘅係呢啲降頭來自香港嘅某一代「自己人」。

香港畢業生長期被矮化,最早落降頭嘅係上一代嘅教育人員同掌握請人權力嘅中級管理層。早喺高明讀書年代,已經受到呢班人指責「香港學生無能、無遠見,Mainland又勤力又醒又抵請,好過香港學生多多聲」。

香港某一代人,會因為少數清華北大精英,而覺得所有中國學生都係精英;反之,只要喺香港見到一個學生讀唔成書,就貶低所有香港學生。如果所有中國學生都係精英,點解李克強會話「中國有6億人每個月收入也就1,000元人民幣」?呢啲成日叫人了解國情嘅人,有冇聽過「三和大神」?喺深圳龍華區曾經有一班人以返一日臨時工去網吧玩三日度日嘅年輕人,後尾取締咗個地方,唔見得班人會由墮落變得發奮。

本來每個地方都有優秀學生,精英比精英、平均比平均先至公道。偏偏香港有一班人,睇唔到、唔知道,然後重複背頌清華北大啲學生好勁,所以香港所有學生都係廢。廿年前開始,集體中降頭,企業加大力度聘請中國畢業生,至今小部份精英操縱大部份請人職位,此消彼長,唔係同鄉嘅香港人由配角變做閒角,將來睇嚟會由閒角變成茄喱啡。

以前香港畢業生會夢想入big four、ibank,後尾入Google同facebook,現時即使畀你入到,最後都係閒角。加上未來政策源源不絕輸入新型勞工,走入舊建制,機會只會留畀有準備嘅新香港人。

舊建制條老路已經絕咗,free ride大企業資源出頭嘅日子已經結束。如果Elon Musk唔搞PayPal,走去做ibank,今日只會多一個有錢中產,而唔係一個夢想火星殖民嘅發明家。

高明

fb.com/bigricetea

關心你飯碗,貼近你生活,即Like「蘋果ATM」FB專頁!
BannerBanner