【智取大市】優質家電股蓄勢待發 - 晉佳

更新時間 (HKT): 2020.12.07 02:00
■海信家電隨時進入下一浸升浪。

目前納指沿住5天線慢升,道指亦破頂,明顯向住另一次超買短期升浪進發。上月下旬美銀美林嘅報告顯示,基金經理持現金比例由4.4%降至4.1%,估計目前會再低,成為一個中長線牛市超買形勢。

如果按返9月大調整前嘅美股作對比,再升多一至兩星期會遇上新一輪調整,而更肯定嘅係,呢浸短期升浪升得越持久,之後嘅跌市會更厲害。呢一刻無法預知高位,可行做法係高位逐步減持,手持股份升到突破保歷加中軸兼大幅拋離5天線作為食糊位,獲利換馬一路縮注。

港股方面,家電股又到可吸納嘅時候,始終智能家居係最入門嘅AI應用,未來透過科技升級,中長線會刺激家電銷售,優質家電股長線可保持大漲小回,尤其喺優質股天價嘅環境下,家電股絕對唔貴。JS環球生活(1691)高位橫行近3個月,似醞釀破頂。至於海信家電(921)由高位回吐近兩成,連日喺11.7元回穩,成交縮小,有機會進入下浸升浪。

海信10月公佈季度業績,第三季收入升七成,扣除非經常性項目後盈利升97%,已經完全擺脫疫情拖累,股價由10元起步升到14元左右再調整,目前調整幅度剛好一半。今年市盈率約12倍左右,來年喺冇疫情拖累下理應有盈利增長,智能家電概念未反映喺估值之上,值得持有。

晉佳

fb.com/advanceguy1

關心你飯碗,貼近你生活,即Like「蘋果ATM」FB專頁!
BannerBanner