【操盤手札記】錢最唔值錢的時代 - 割柑人

更新時間 (HKT): 2020.12.08 02:00
■新世界坐擁農地土儲,政府加快發展新界北部,對集團有利。 資料圖片

近排環球股市都見炒風,無他,關美元事!市場熱炒疫苗面世,經濟復蘇,預計聯儲局喺通脹預期下,超低息、買債放水不變,美元弱勢持續。上周五,美滙指數低見90.48,美國10年期債息高見0.98厘,美滙跌、債息升,反映市場風險胃納上升,資金流去風險資產如股市。

資金捧新興市場,博價滙齊升。過去一個月,台、星、韓股分別大升一成至一成半。港股雖然喺26000至27000橫行成個月,但成交暢旺,據富瑞資金流報告,截至上周三嘅一周,港股基金、中資股基金分別錄21億元、271億元淨流入;北水亦持續流入,上周錄228億元淨額。

周一,港股受到富時因應美國制裁剔走8隻中概股,以及美國將再制裁至少12個中國官員嘅消息拖累下跌,收26506,跌1.2%,險守20天線。其實兩年幾以嚟,美國制裁中國、中國反制美國嘅消息已經恒常化,相信今趟大市只係調整而非轉勢,短線支持睇26000,阻力睇27000。

喺「錢最唔值錢」嘅時代,股樓受青睞。第四波疫情下,市道慘淡,各界減價促銷,只得樓價獨俏。新盤如新世界(017)大圍柏傲莊、恒地(012)佐敦本木等都熱賣;惟本地地產股則跟隨疫情、疫苗消息反覆,但喺新舊經濟股輪流炒下,亦可分注吸納,話晒市賬率偏低。

地產股中,新世界近年陸續出售非核心物業,以優化資產同業務組合。政府加快發展新界北部,有利坐擁農地土儲嘅新世界。另外,機場航天城、啟德體育園項目,未來亦會帶來盈利貢獻。集團上周五再度回購,回購價介乎36.95至37元。該股昨收37.6元,升1.6%,股息率5.4厘,市賬率0.45倍,可算吸引。

割柑人

關心你飯碗,貼近你生活,即Like「蘋果ATM」FB專頁!
BannerBanner