蘋果驗樓|元朗五球劏房變「暗瘡屋」 山水盈空心磚打完針仍空心 

更新時間 (HKT): 2020.12.11 00:00

近期內房在香港興建的新樓排隊交樓,今次輪到路勁(1098)元朗山水盈。業主葉小姐以近500萬元買入一個實用300方呎的劏房自住,她見到大門已唔開胃,事關門柄鬆到震。全屋兩幅牆,都可以有一道超長裂紋。驗樓師陳智康「康仔」話這兩項只是小瑕疵,反而最大問題是鋪磚,因為執完衰過唔執,露台牆身瓷磚執到一笪笪似「暗瘡印」,廁所空心磚打完針都是空心,兼且留底礙眼的針窿。單位評分71分,比早前另一個單位好少少,因為上次單位的廚房洗碗盆漏水漏滿櫃底。

元朗山水盈位於凹頭,記者由元朗站飛的,滿頭白髮疑似地膽的士佬疑惑地問:「你想爾巒兜入,還是兜PARK YOHO?」事旦啦,最終揀PARK YOHO屋苑駛過,搵到一條名為高埔徑抵達山水盈屋苑大閘。交通不方便?業主葉小姐話唔覺,因為屋苑有專線小巴出入元朗站,而且近大欖隧道。

葉小姐坦言,本身都不是想買山水盈,睇過半新樓包括屯門雙寓及元朗錦上路PARK YOHO,「雙寓價錢唔係特別相宜,我哋筆直只是睇到200幾方呎,業主開價唔鬆手,價錢同新樓差唔多,咁我不如買新樓好過。PARK YOHO睇咗第1座300幾呎,一樣有露台又開放式,差唔多呎價,但開價都貴過呢度(山水盈)……PARK YOHO樓下有濕地,應該好多蚊,最終無揀。」手持約100萬元資金,可以選擇二手樓,但她覺得:「啱我哋筆直嘅二手樓差唔多30年樓齡,考慮裝修費,過多幾年可能大維修,計完條數,新樓化算啲。」最終花約500萬元買入一個開放式單位,實用300方呎,打算自住,「覺得遲啲買唔到,其實買定租都考慮咗好耐,望住樓價一路升,係唔會返轉頭,糾結咗好幾年,先的起心肝睇樓,去做呢件事。」

但了解路勁這個發展商嗎?她回應:「啲經紀都有同我講過吓發展商啲背景,但相比大品牌,而家新樓質素都唔見得有牌子會係非常之好,所以無太介意發展商嘅背景。搵過幾個經紀,口徑一致,話呢個盤係佢哋喺香港第一個盤,一定打響炮,做得好好,十個經紀十個都係咁講。我無因為佢呢句說話,而期望佢好好或好差,覺得唔會太差既。」12月初收樓,她覺得大門、廁所、露台、牆身都有問題,特別是大門以及牆身有一道超長裂紋。

記者與驗樓師陳智康未入單位,已看見大門一笪笪崩花,伸手推門,咦!門銷鬆到震,康仔指:「明顯螺絲未扭實……刮花執灰補油就算,唔好整道門更換,拆咗再裝,螺絲會無咁實。」300方呎全新劏房,地板幾塊瓷,如有空心認真抵鬧,但靠近露台一塊磚就切割差,康仔認為是馬虎了事。露台牆身無空心磚,但掃口位竟然一笪笪,康仔解釋:「瓷縫掃口位之前有窿仔,就搵掃口粉補返,但就出現色差問題,搞到好似暗瘡一笪笪,應該搵返相近嘅顏色先啱,而家可能要整幅牆重油。大部份本地發展商都會搞,因為好簡單,一陣就油晒。(咁內地發展商呢?)咁就唔知啦。」露台欄柵都有個積水位,是框架裝得差,現場實測,不幸言中,「長期積水,有機會生銹,而家縫位有窿仔,亦會由窿仔滲水,造成漏水。」

單位瓷磚認真麻麻,浴室淋浴間牆身磚夾縫掃口位窿仔多不勝數,其中一塊磚面更出現一個針窿,康仔解釋:「打過針,未補返個窿。不過打完針,塊磚都仲有空心,我建議換左佢啦。」洗手盆無漏水,但櫃就裝得差,差到出軌。開放式廚房好多地方都歪歪斜斜,枱面石斜,櫃底阻醜的踢腳板彎曲,最好重裝。開放式廚房旁牆身那一道由燈掣延伸至天花的超長裂紋,「背後明顯係燈槽,冷縮熱脹而出現裂紋,只可以鏟底貼條駁口帶修補。」康仔總結,瓷磚0分,門這項工種都不及格,廁櫃及廚櫃方面亦扣分多,單位評分71分,算是中規中矩,「呢個單位唔算好差,之前驗過一個單位廚房洗碗盆溢水口漏水漏滿整個櫃底。」

-----------------------------

掌握理財智慧 感受生活品味

investMAN全新網頁 優雅登場

-----------------------------

部署退休 輕鬆達至財務自由

點擊即睇《退休理財天書》

-----------------------------

【全球樓行】 Dream House零距離

屬於香港人的移民攻略

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

關心你飯碗,貼近你生活,即Like「蘋果ATM」FB專頁!
BannerBanner