【智取大市】新股瘋狂炒到出年 - 晉佳

更新時間 (HKT): 2020.12.14 02:00
■Snowflake年收入升逾倍,股價前排再破頂,𠵱家賣200倍市銷率,可想而知有幾癲。 互聯網圖片

納指上星期三曾經顯著單日調整,其後星期四、五一連兩日回穩,市況似準備再度興奮。踏入12月中都未有見頂迹象,消化短線超賣後,似乎指數慢升、炒股不炒市嘅癲況可能持續到明年初。

估頂向來不容易,亦冇必要要求自己估得中,能夠做嘅只係控制注碼,逢高下調倉位,餘下注碼由佢炒得幾耐得幾耐。

新股市場進入瘋狂狀態,潮玩股份泡泡瑪特(9992)憑住獨特概念兼高增長,股價首日上市最高價可以升到歷史市銷率(Price-to-Sales Ratio,P/S)100倍水平,講緊係玩具股!美股新上市AI股C3.ai上市翌日周四大升四成,周五回吐8%後,市銷率都有70倍,收入年增長大約70%。

年收入升逾倍嘅Snowflake前排再破頂,𠵱家更加能賣200倍市銷率。估值當然係相當離譜,已經賣一個未來生意大成功都未必值嘅價格,問題係話畀大家聽新股市場有幾癲,市場上只要有持續高收入增長嘅股份上市,賣完天價都仲能夠爆升。

美股新股市場裏面,嚟緊值得留意嘅係周三上市嘅AI貸款平台Upstart Holdings,今年首三季收入增長44%,已經成功虧轉盈,暫時招股價20至22美元,金融類股份即使高增長,市銷率照計都唔會衝到上百倍,即管睇睇周三點開價,睇吓有冇水位。

晉佳

fb.com/advanceguy1

關心你飯碗,貼近你生活,即Like「蘋果ATM」FB專頁!
BannerBanner