【操盤手札記】炒復蘇炒到明年 - 割柑人

更新時間 (HKT): 2020.12.15 02:00
■明年投資主題必定包括「復蘇」,百勝中國係中國最大餐飲集團,近年加強數碼化同外賣業務,獲券商睇好。 資料圖片

繼俄國、英國分別喺前周、上周開始新冠疫苗接種後,本周輪到美國、加拿大。港府亦已洽購3款疫苗:一為科興疫苗;一為復星、BioNTech疫苗(並非輝瑞、BioNTech版本);另一為牛津、阿斯利康疫苗。

國產疫苗下月抵港,港人有幾愛用國貨?睇有幾多間國貨公司就知!科興同復星,都係中國公司。復星醫藥(2196)股民唔會陌生,但科興呢?其實科興2003年已喺美國OTCBB掛牌,2004年轉板AMEX,2009年再轉板Nasdaq,但2019年2月22日起停牌至今。話說科興2016年啟動私有化引發內訌,2019年以「毒丸計劃」稀釋股權引發訴訟而停牌。

科興2003年掛牌時股價0.77美元,2009年高見12.5美元,2019年停牌前報6.47美元。科興疫苗面市,但停牌無得炒。不過,都有隻概念股,就係中生製藥(1177),該公司上周以5.15億美元入股科興旗下科興中維15.03%。炒中國醫藥股,必須注意政策風險,例如帶量採購。

港股由炒疫苗面世到炒疫苗接種已炒幾轉,疫苗消息刺激有限;加上新股抽走資金,大市欲升乏力。周一,恒指跌0.4%,收26389,短期料繼續喺26000至27000上落,支持位睇前浪底26256。

明年投資主題必定包括「復蘇」,事實上,按市場領先經濟半年計,資金早已行動。中國最早走出疫情陰霾,復蘇亦會較快,內需消費股如汽車股、餐飲股等,已見炒風。以銷售額計,百勝中國(9987)係中國最大餐飲集團,近年加強數碼化同外賣業務,獲券商睇好。招銀國際預測其2019至2022財年純利複合年均增長率為14%,相對同業海底撈(6862)同九毛九(9922),其估值更吸引。

割柑人

關心你飯碗,貼近你生活,即Like「蘋果ATM」FB專頁!
BannerBanner