【異動空間】博年結反彈揀呢隻 - 魏力

更新時間 (HKT): 2020.12.18 02:00
■醫保談判塵埃落定,帶動醫藥股、醫療設備股來個「年結反彈」。互聯網圖片

點睇美聯儲議息結果?魏力會形容為「言辭上放鴿,但實際無行動」。鮑老講:「未來經濟視乎疫情,但疫苗我都控制唔到,所以可以做嘅就係繼續買債,買到個經濟復蘇、通脹去返2%、充份就業,咁先會考慮減慢放水。」樂觀去睇係定心丸,換個角度就係「冇咩可以再做」。

另外,鮑老有兩個觀點值得細味:一、炒經濟復蘇、商品價格升都係一次性,長遠對通脹影響不大,因為「要通脹升其實好難」。二、股市估值過高,但主要因為10年期債息遠低於歷史水平,目前問題不大,亦見唔到危險訊號。唔驚通脹、唔驚股市炒爆,講到咁白,盡晒力了。

執筆時,美滙指數終於跌穿90大關,小心拜登上台前後會來個「物極必反」,眾人睇淡美元之下掉頭挾上。

弱美元之下,商品、航運股最為受惠,但目前無謂高追,耐心等回調再吸較為上算。另一邊廂,醫保談判塵埃落定,帶動醫藥股、醫療設備股來個「年結反彈」,穩穩陣陣可留意隻翰森製藥(3692),33元水平形成「雙底」後反撲,頸線位於37.2元,如升穿可望挑戰歷史高位40元水平。

筆者為證監會持牌人,未持有上述股份財務權益。

魏力

fb.com/2012jason

關心你飯碗,貼近你生活,即Like「蘋果ATM」FB專頁!
BannerBanner