笑到最後|唔敢買股票算唔算窮人思維(高明)

更新時間 (HKT): 2020.12.20 12:39
(蘋果新聞網)

唔算。

連登一個post問,唔敢買股票算唔算窮人思維?搵錢根本冇單一渠道,必須根據自己知識、性格、經驗等等綜合技能,嚟得出最有效嘅謀生技能。舉例來說,如果你正職已經花去你大部份時間及心力,冇時間研究股票,買賣股票反而可能令你負收入。

事實上,有人根本就唔鍾意炒股票,其中一類人本質上唔鍾意賭博,對於錢搵錢冇興趣;另一類人本身係賭徒,覺得炒股票太慢, 鋤大D、打麻雀幾分鐘有結果先至係真正搵錢方法。

搵錢好多方法,困死一途先係窮人思維。十大富豪中,真正純粹靠股票發達,只有畢菲特一個,其他富豪都係靠做實業起家,然後將公司上市,人哋炒高股價幫佢發達。證明做賭場仍然發達過做賭仔。

唔計上述超級富豪,福布斯最新公布最有錢YouTuber,玩具KOL Ryan Kaji一年賺2.34億港元,如果佢將精力放喺炒股票度,未必有佢拆玩具咁賺錢。人各有志,炒股票一定會發達,只係因為好多人贏咗就放上網講,輸咗冇出聲。

退一萬步,有人夠食夠冚知足就夠,買股票增加壓力,輕輕鬆鬆過日晨仲開心,呢種人心境富有過好多窮得只剩下錢嘅人。

股海窮人思維係乜?就係成日睇住想買,但升唔買、跌唔買,一路只係心思思想入貨,但又驚一入即跌,點知轉個頭買部iPhone 12冇難度,三秒㩒掣。

正如本欄多次反覆強調,初入場,用消費品價格做注碼,例如本身想買iPhone 12 Pro Max ,可以改為將萬零蚊買入蘋果(AAPL)。iPhone本身跌一嘢爆mon ,冇AppleCare 都使兩千幾,即輸兩成。蘋果股價急跌兩成,機會低過你部機跌爆mon,而且跌爆Mon部機即刻沽唔出,蘋果股價跌兩成仲沽得出,風險值博一比較就知點揀。

唔買股票冇錯,怕輸係人性。怕輸得嚟轉個頭買消費品面不改容,先係窮人思維。

https://www.facebook.com/bigricetea

高明

-----------------------------

掌握理財智慧 感受生活品味

investMAN全新網頁 優雅登場

-----------------------------

部署退休 輕鬆達至財務自由

點擊即睇《退休理財天書》

-----------------------------

【全球樓行】 Dream House零距離

屬於香港人的移民攻略

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

關心你飯碗,貼近你生活,即Like「蘋果ATM」FB專頁!
BannerBanner