【智取大市】趕絕外資 港股點會強 - 晉佳

更新時間 (HKT): 2020.12.21 02:00
■近期一連串政治打壓難免打擊市場信心,港股短期內唔想跑輸美股都難。 資料圖片

特朗普卸任前繼續出手打壓中概股,令資金焗住追捧美國本土股份,似乎有心撐住美國科技股升勢頂到明年初。至於港股,就有港共政府幫忙趕客,許智峯凍結戶口事件,直到黎智英被捕,一連串政治打壓難免打擊市場信心,外資即使未減持都肯定唔諗住加注,港股短期內唔想跑輸美股都難。

新股泡沫喺港股美股市場共同存在,貴到癲嘅泡泡瑪特(9992)再挑戰首日掛牌高位。美股方面,上星期三上市嘅Upstart首日一度落返接近招股價嘅最低22.61美元,3日內可以炒高一倍;c3.ai回到100美元,3日後炒返上140美元。

上星期上市嘅小家電股VESYNC(2148),公開招股派發比例異常,趕絕散戶,變相更貨乾,首日上市表現遜於暗盤,但相對泡泡瑪特首日走勢已較佳,其後泡泡瑪特都可以再試頂,估值較平易更人、更細隻而招股亦受市場歡迎嘅VESYNC,似乎唔會首日就見頂。

VESYNC開業只係9年,一開始已有家居照明產品喺亞馬遜賣,其後升呢搞智能家居,2016年再推出廚電品牌,專打美國市場。受惠宅經濟,產品今年因應疫情而大賣,半年賺1.74億港元,勁升10倍,年輕企業能夠把握機會開拓市場,有優質股嘅特質,疫後業績或能延續,短期而言,估計仍會有一輪炒作。

晉佳

fb.com/advanceguy1

關心你飯碗,貼近你生活,即Like「蘋果ATM」FB專頁!
BannerBanner