【操盤手札記】「煤超瘋」有乜啟示 - 割柑人

更新時間 (HKT): 2020.12.22 02:00
■風電股老大金風科技股價連日破頂,7月下旬以嚟,已被炒過多轉,宜候回吐吸納。 互聯網圖片

12月7日,中國公佈11月外貿總值、出口值同創新高。惟12月8日起,浙江、湖南、江西、陝西相繼頒佈限電令,本周一凌晨,廣東又突然大停電;山東、山西、河北、河南則相繼頒布限產令。出口廠商捱疫情捱到出口好轉,點知年尾趕貨,限電被迫停工,賺錢不成反賠錢。

點解限電?因為電煤供應緊絀。點解緊絀?除咗因為寒冬、減排,仲因為中澳交惡!中國嘅主要煤炭入口國係澳洲,但11月6日起暫停澳洲煤炭清關,造成供應缺口。中國7月曾指澳洲「搬起石頭砸自己腳」,上周五「戰狼」外長王毅卻放軟指「中澳都是亞太大家庭一員」。中國出口廠商面對嘅困境,何止電荒,仲有航運成本飆升、人民幣滙率升值。

煤炭入口減少,已令煤價瘋漲;疫情影響全球航運能力,亦令運費瘋漲;此外,6月迄今,人民幣兌美元升值9%,更令利潤蒸發。出口股宜暫避,煤炭股則短炒無妨,長揸無謂,畢竟煤炭不符國策。國策係點?上周舉行嘅中央經濟工作會議提出八大任務,第八項係「做好碳達峯、碳中和工作」,要加快調整能源結構,大力發展新能源。

現時電力供不應求,本來火電股有運行,但因燃煤發電,動力煤價格按月升兩成,「煤超瘋」蠶食利潤,而且唔係新能源,實難受惠。新能源股則可進一步睇好,例如風電股、光伏股。花旗發表報告,預期2030年中國風電、太陽能發電總裝機容量將超過14億千瓦以上;瑞信更牛,預期可達19億千瓦。風電股嘅老大金風科技(2208)已連日破頂,周一再升6.6%,收14.3元;不過,該股7月下旬以嚟,已被炒過多轉,宜候回吐吸納。

割柑人

關心你飯碗,貼近你生活,即Like「蘋果ATM」FB專頁!
BannerBanner