華爾街戰線|實戰倉跟上大市同步贏1400美元 下年不想努力靠「契媽」?

更新時間 (HKT): 2020.12.25 00:01

臨近聖誕年尾,美股似乎未見holiday mood,DNA治療、新能源、網絡保安股仍然炒到癲,想沽貨放假又怕錯過,惟有驚住炒兼思考人生,回顧倉位及搵下年投資機會。

先利申今年7月開波的實戰倉跟得上標普500指數今年全年回報14%,叫做不過不失,而同期七月開始坐SPY或QQQ可能有更佳回報。

1.水浸 vs 估值

回顧今年大冧市,仍然都是用印錢去解決問題,要用一張圖去解釋過去一年股市表現,將聯儲局資產負債表與標指拍埋就唔使講得太多,而且美國的刺激經濟或叫派錢方案始終都會在拖拖拉拉之下通過,現金恐怕只會越來越唔值錢。

而對於股票貴問題,舉個例蘋果周三收市價130.96美元的預測PE 32.6倍遠遠高過2年平均水平的20.8倍,但再睇每100蚊的AAPL股價,其實係賺到3蚊(earning yield:3%),只要對比起無風險指標10年美國國債回報率仍未有1%,都好難話貴到離譜。這說法不論是鮑威爾定橋水Ray Dalio(50倍PE論)都不約而同地判斷股市估值需要比較去睇,所以話一味怕貴而唔參與恐怕不現實。

2.契媽!我不想努力了

只要望返過去ARK系列ETF過去的表現,撫心自問,哪裡來的自信可以拍得住Cathie Wood表現,而特別是當你有得揀交錢畀佢操盤。

接下的問題就相對簡單,2021年ARK入面5隻ETF,除旗艦ARKK以外再細分4個主題,其中互聯網ARKW及DNA醫療概念ARKG今年大大爆發,尤其後者ARKG並沒有Tesla的情況下仍然超班,其中的原因是DNA治療出現突破(見舊作有提到︰t.ly/HDD2),另一個催化劑就要數到去Cathie Wood在12月18日在彭博訪問中講話睇下年表現DNA治療股較Tesla有更大爆發力,之後幾日ARKG就抽高逾一成。

整個35分鐘訪問值得花心機去睇晒(t.ly/8fs8),特別係講到ARK投資理念部份,挑選未來5年能夠有平均15%回報,最終可以在5年倍升的顛覆性企業,而當創新科技估值太貴時,相對之下FAANG就反而是她的「現金」防守倉位,所以從ARK交易紀錄可以睇到,當隻EDIT在10日炒高一倍其間,其實會慢慢食糊沽上去。

假如相信女股神的眼光及操作,「落後」的ARKF及ARKQ(但都有一倍升幅),值得睇高一線。尤其是ARKQ主打自動駕駛、機械人、3D打印科技,更貼近未來無人駕駛發展。

3.晶片股仍然係主角

All in「契媽」以外的選擇,不妨望去近期靜下來的晶片股,諗法係雲端、5G電話固然會繼續好之外。仲要睇埋演進落去的無人駕駛智能電動車,看似很距離很遠,但今年預期得EV採用率會加速,見到自動駕駛成形加快亦唔奇。

而晶片股理應快過電動車起動。市場上除Tesla獨家自家做之外,就要講到最貴但又最先進Nvidia,合作對象則包括小鵬汽車或Benz等,講緊2025年有250億市場對比今年NVDA只有7億美元來自汽車晶片。

(杜昇)

1萬美金買咩好?

【華爾街戰線】與您實戰拍住上

即Like【華爾街戰線】FB Page

-----------------------------

掌握理財智慧 感受生活品味

investMAN全新網頁 優雅登場

-----------------------------

部署退休 輕鬆達至財務自由

點擊即睇《退休理財天書》

-----------------------------

【全球樓行】 Dream House零距離

屬於香港人的移民攻略

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

關心你飯碗,貼近你生活,即Like「蘋果ATM」FB專頁!
BannerBanner