笑到最後|提防我們心中的「祖拜登」(高明)

更新時間 (HKT): 2020.12.27 12:06

下一任美國總統誰屬,現時係咪大局已定,唔使問侵陣營,問一問所謂「當選副總統」辭去參議員一職、全情投入新工作未?據報仲未,就好似所有打工仔轉工嘅心情一樣,新公司日日話有Offer但係遲遲未簽約,醒目仔女梗係打死都唔辭職啦。

好多識美國朋友嘅香港人成日都話:我啲朋友多數撐拜登。呢個取樣並冇參考性,大選總票數係真定假仍然有爭議性,不過投票分布應該係真,城市傾向拜登;鄉郊傾向侵。香港人去到美國,識到城市人嘅機會較大。

拜登從政47年最大貢獻,撇開佢個仔嘅職位,可能就係供樓。除咗反侵之外,究竟有咩人會真心支持一個老政客呢?高明一直百思不得其解,直至一個美國朋友P分享一段拜登演講,表現有如一般政客,朋友P竟然話:「咁樣先係一個總統講嘢」。佢講完我先明白到,支持者來自一群渴望安逸嘅選民。

因為真正嘅轉變,過程必然會帶來痛苦。世界經濟發展到另一極端,社會精英多數成為大企業嘅一粒螺絲,每日埋頭生產工序一小部份,安分守己,月/星期尾穩陣出糧。轉變機會成本太大,把口可能支持政治正確議題例如女權、同性戀等等,實質恐懼轉變,你睇「當選副總統」仲未捨得辭工,就知打工仔幾恐懼轉變。

拜登嘅象徵意義,就係安逸。美豬明知要變,但唔願接受轉變嘅痛苦,惟有選個齋吹唔做嘅人安慰自己。

每個人心入邊,可能都有個祖拜登,希望食長期飯票,害怕轉變,又要扮潮。喺香港,我哋稱呢啲人做港豬。

可惜過去兩年,香港人見過無數難以想像嘅變幻。即使「我唔知、我睇唔到、我唔理、我討厭政治」,一隻螞蟻集團IPO,竟然可以上市前兩日取消。相對身於安逸嘅美國城市中產,香港人反而見過世面。

New year’s resolution,新年決志,不論工作、股票,定其他,提防被內心嘅「祖拜登」支配。安穩港豬嘅生存空間越來越窄,怕轉變帶來嘅痛苦,最後「被轉變」可能更痛苦。天佑香港人。

https://www.facebook.com/bigricetea/

-----------------------------

掌握理財智慧 感受生活品味

investMAN全新網頁 優雅登場

-----------------------------

部署退休 輕鬆達至財務自由

點擊即睇《退休理財天書》

-----------------------------

【全球樓行】 Dream House零距離

屬於香港人的移民攻略

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

關心你飯碗,貼近你生活,即Like「蘋果ATM」FB專頁!
BannerBanner