異動空間|明年建倉大戰略(魏力)

更新時間 (HKT): 2020.12.27 18:43
(蘋果新聞網)

本欄今年最後一篇,本想例排來個回顧加展望,但今年由第二季開始升到尾,多年難得一見,落場都係賺多賺少,再回顧意義不大,今年寫寫展望就算吧!

目前市場近乎一致預期明年經濟復蘇(因為有疫苗),央行會繼續印錢,而通脹會升但仍然溫和,遠未到加息的時候,牌面睇簡直係炒股的天堂!當然,就算展望幾好,都唔會由頭升到尾,魏力睇明年是「先低後高」的格局,皆因2020年全球主題就是炒放水、炒疫苗、炒復蘇,只要願望稍稍落空,自然觸發回調,短期要密切留意病毒變種情況,會否削弱疫苗效果?歐美封城措施會否延至第一季後段、甚至第二季?

投資組合方面,目前睇新舊經濟各半較為合適,美國科技股做膽作中長線投資,而舊經濟則因復蘇未穩、波幅較大,宜半炒半坐,盡量以短炒盈利,降低中線持貨成本。港股方面,科技股因反壟斷法受壓,締造低吸機會,但也毋須急於出手,先觀察1月份股市格局再決定不遲。另一大主題是內需消費,中高檔飲食股、電動車、家電股等可以留意。

至於近期熱炒的新能源概念股(如光伏、風電等),近月走勢猶如2012年第四季的頁岩氣股,有參考價值。當年頁岩氣被吹捧為新一代潔淨能源,配合國策扶持,相關股炒到飛沙劈石,安東油服(3337)、宏華(196)單季齊飆120%,結果翌年1月就出現調整,其後才再展升浪。

 想食新能源大浪的戰友,試幻想自己是一名狩獵者,而手中子彈有限,當然是等待獵物靠近才出手,務求一擊即中,而目前機會尚未出現。明年再見!

 筆者為香港證監會持牌人,未持有上述股份財務權益。

 www.facebook.com/2012jason

www.instagram.com/ngailik.stocks/

-----------------------------

掌握理財智慧 感受生活品味

investMAN全新網頁 優雅登場

-----------------------------

部署退休 輕鬆達至財務自由

點擊即睇《退休理財天書》

-----------------------------

【全球樓行】 Dream House零距離

屬於香港人的移民攻略

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

關心你飯碗,貼近你生活,即Like「蘋果ATM」FB專頁!
BannerBanner