【智取大市】2021避險大潮流 - 晉佳

更新時間 (HKT): 2020.12.28 02:00
■美股下個臨界點會係幾時?有可能係1月20日拜登就職。

股市一向難以就每個calendar year去做預測,舊年年尾邊有人估到武肺改變環球金融市場生態?所以估嚟都多餘,尤其預測指數點數更冇意思。

目前大環境係,美股估值炒到離晒大譜,無論係高增長科技股以至微增長嘅非科技股,普遍已經炒到long fund入市無利可圖嘅地步,即使FANGMAN以至香港ATMXJ都進入低回報階段,估計踏入2021年,避險、保值會成為long fund大部份時間嘅一大課題。

不過,避險、保值趨勢似乎未喺呢一刻開始發生。納指年底前繼續守5天線穩步上揚,假期前美股半日市當中,當炒股錄得回吐,相信只係唞氣,炒股不炒市似乎能夠炒到明年初,下個臨界點會係幾時?有可能係1月20日拜登就職。特朗普任期之中嘅一大功績,係帶嚟美股大牛市,去到拜登接任,市場上唔排除有共和黨內嘅維穩資金逐步獲利離場,沽壓難料,總之換班對於股市資金流係中性至略為不利嘅因素。

從月線圖睇,又接近出現嚴重超買訊號,納指下月初會否高過保歷加上軸開市?即係今年9月初大跌市嘅類似情況?指數升浪越持久,及後大調整嘅幅度亦會越大,有可能比9月初大跌市更來勢洶洶。短炒嘅話,半新股升至明顯拋離5天線先食糊,回落5天線有支持再跟進,且戰且走。

晉佳

fb.com/advanceguy1

關心你飯碗,貼近你生活,即Like「蘋果ATM」FB專頁!
BannerBanner