【操盤手札記】恐怖的網遊世界 - 割柑人

更新時間 (HKT): 2020.12.29 02:00
■內地上市公司游族網絡董事長林奇逝世。互聯網

12月16日傍晚,上海,林奇離開公司回家,途中突然劇痛,隨即趕去醫院,呼吸心跳一度停止而需搶救。當晚轉到公立三甲醫院,翌日腦幹死亡。林出事前食過藍莓,疑含河豚毒素。12月17日,警方接報調查,隨即展開偵查,發現林奇的同事許某有重大犯案嫌疑,並將其拘補。

林奇是誰?內地上市公司游族網絡(深:002174)董事長兼CEO,持股23.99%,身家68億人民幣;而內媒報道指,警方通報內提及的「許某」,疑為原游族董事,被任命為旗下三體宇宙CEO的許垚。游族係網絡遊戲商,擁有科幻小說《三體》版權,9月時,許牽線夥拍Netflix拍劇。

現實世界嘅權鬥,恍如電影橋段。對投資界嚟講,呢單案更涉及公司訊息披露有冇違規。話說17日報警懷疑中毒,23日公司公告卻有隱瞞之嫌。法律界指,訊息披露有冇違規,關鍵係林身體狀況,腦死係咪屬實,若如公告所言「身體狀況穩定並在持續好轉」,就不涉違規。

本來科網企業喺反壟斷風口下,網遊係產品、唔係平台影響唔大,但游族因呢單案,由12月17日至今累跌22.9%,相對風眼中嘅阿里巴巴(9988)同期跌16.3%,有網遊業務嘅騰訊(700)同期跌9.2%,游族更傷。不過,國策唔係顧念網遊,前年就曾凍結版號審批9個月。

周一港股牛皮偏軟,跌0.3%,後市主要睇疫情同國策;科網股則腥風血雨,ATM分別挫8%、6.7%、6.9%,規管措施未盡出,ATM未宜撈底。中央經濟工作會議列八大任務,包括強化國家戰略科技力量、強化反壟斷。《人民日報》解畫,反壟斷並不意味對平台經濟支持有變。嗯,國策係好奇妙嘅,尤其喺中國。

割柑人

關心你飯碗,貼近你生活,即Like「蘋果ATM」FB專頁!
BannerBanner