【冰說聰明】來年染藍新貴咪走雞 - 青冰

更新時間 (HKT): 2020.12.31 02:00
■京東健康隨時納入恒指成份股。

恒指改革正進行諮詢,提出五大優化建議,2月將公佈結果,雖然2月係季檢之時,但按恒指公司以往諮詢的慣常做法,新例都會在下次生效,換言之,5月才是真正變革。

五大優化中,最重要的是按行業作篩選目標,根據行業分組去挑選,對市值較細的行業龍頭有利,試想想,日後嚟上市的大市值股,十居其九都同科技有關,唔通隻隻都染藍咩,創科(669)今年累升七成,係卓越表現成份股,但現時市值都係千九億,拍埋其他科字輩仲係輸一截,但在新例下,按行業排隊,類似創科的股票,染藍仲有希望。

成份股亦會增加到65隻至80隻,現時52隻,即係起碼會加13隻,而恒指公司在諮詢文件中亦做了一個模擬測試,含金量極高,間接披露了想加乜股,以65隻目標為例,科技股會加3隻、醫療保健加5隻、公用事業加3隻及非必需性消費加3隻。來年仲有咁多科技股上市,3個位應該會爭崩頭,而醫療保健中,京東健康(6618)、阿里健康(241)、翰森製藥(3692)及平安好醫生(1833)都有較大機會。公用股應會揀上中國燃氣(384)及新奧能源(2688),至於非必需性消費板塊,思摩爾(6969)及海底撈(6862)應該無懸念,戰友可能會問,農夫山泉(9633)呢?唔使緊張,恒指將佢歸類為必需性消費,都會加一隻的,所以亦應非佢莫屬。

而取消上市時間要求,令來年巨型新股有更多捧場客,有直入指數直通車,基金上市首天都唔敢唔追貨啦。至於更改權重就影響有限,騰訊(700)及友邦(1299)的權重按理會下調2%,但恒指公司話新例會在一年內分段做,即係兩巴仙都可能要分幾次,相信影響力點都會少過半個反壟斷消息吧。有咗這個新貴初稿,揀定幾隻做下年的核心持股,應該好過花時間去估恒指下年睇幾多呀。

青冰

fb.com/chingbing888

關心你飯碗,貼近你生活,即Like「蘋果ATM」FB專頁!
BannerBanner