笑到最後|一注獨贏買姜濤(高明)

更新時間 (HKT): 2021.01.03 11:46

新年第一個驚喜,就係叱咤樂壇我最喜愛男歌手,頒咗畀姜濤。據講係史上最年輕得主,然後掃一掃臉書,再掃埋討論區,得奬後出現爭議,一睇,就知佢紅硬。

人類總會有一個壞習慣:拒絕接受新事物。當你自覺得好in嘅時候,反射神經一到,任何稍為偏離正軌、脫離大眾嘅事,你都會反對。再進一步,比起純粹拒絕接受新事物,有一種態度唔單止討厭,仲有害自己荷包,叫「扮清高」。

高明先唔講2010年嘅Bitcoin、2011年嘅Tesla,淨係講iPhone。幾乎所有先進國家嘅人都會用過,已經近乎冇科技,只係一件消費品,超級容易理解。每次iPhone一出,一定有一班懶係了解科技自覺高深嘅人大踩特踩,跟住好清高加一句:蘋果冇咗喬布斯之後已經玩完。

結果係點?就係每次新iPhone發售,你做班科技淡友對家,佢去買華為之類嘅「An機」,你拎買一萬幾千蚊蘋果股票,依家揸住叠股票大巴大巴車班淡友面。

再講Bitcoin,一路被傳統財經界話係騙局,當然中間亦有騙子借加密貨幣、掘礦呃過錢,但喺騙局嘅論述之中,傳統財經界提供唔到一個願景,點樣賺得比佢哋口中嘅「騙局」更多,成日話好驚好驚,結果機會一個一個咁喺身邊而過。

爭議,就係資產價格上升嘅助燃劑,只會見到蘋果產品由iPhone、iPad到MacBook都有淡友狂批評;微軟Surface Pro 8同期推出,會有人買、唔多人講、好少人批評,就見證兩者嘅分別。資本市場冇淡友就好難挾倉;現實世界,產品越多批評、曝光率越高,免費宣傳觸及更多人,銷量就越好。至於話事嘅億萬富豪更加係「玻璃心」,你踩佢,佢為啖氣,博老命令產品成功塞住你把嘴,亦令股價上升。

返轉頭講姜濤得奬嘅爭議,反而令到佢更加多人討論,第一段話佢紅硬已經唔正確,事實係喺爭議之中已經紅咗。

已經2021年,唔係2011年。如果你今日仲講緊「姜濤未夠班,哥哥/麟伯/學友/Eason嗰啲先壓到場」,我勸你買死一世滙控(005)。舒適圈其實都可以活得自在,無必要衝出嚟踩其他願意走出舒適圈嘗試嘅人。

https://www.facebook.com/bigricetea/

-----------------------------

掌握理財智慧 感受生活品味

investMAN全新網頁 優雅登場

-----------------------------

部署退休 輕鬆達至財務自由

點擊即睇《退休理財天書》

-----------------------------

【全球樓行】 Dream House零距離

屬於香港人的移民攻略

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

關心你飯碗,貼近你生活,即Like「蘋果ATM」FB專頁!
BannerBanner