【操盤手札記】凜冬已至 趨吉避凶 - 割柑人

更新時間 (HKT): 2021.01.05 02:00
■中央加強反壟斷法,阿里、美團呢類平台老大受,京東反而有機受惠。 資料圖片

權力遊戲之下,凛冬兩個月前已至!講緊科網股。2020年11月2日,中國發佈網絡貸款管理新規;3日,螞蟻上市突被煞停;10日,當局發佈平台經濟反壟斷指南;12月14日,阿里(9988)、閱文(772)等涉收購違反反壟斷法被罰款;24日,阿里涉「二選一」壟斷被調查。

嚟到2021年,根據中央經濟工作會議所列今年八大任務,包括「強化反壟斷和防止資本無序擴張」。此前五中全會拍板嘅「十四五」規劃,已提「加強反壟斷和反不正當競爭執法司法」,可見反壟斷唔止係今年,更係未來5年任務。按反壟斷法,違者可罰10%年度收入,好揦脷。

反壟斷之風,不獨中國颳起,歐美亦然。美國正對Google、facebook提出多宗反壟斷訴訟;歐盟亦對Amazon提出反壟斷指控。喺歐美,科網巨頭可打官司;但喺中國,科網巨頭紛紛低頭,只以「積極整改」回應。喺歐美,多數罰款了事;但喺中國,以螞蟻事件嚟睇,走唔甩要拆骨。

喺電商同外賣行業,以GMV睇,阿里喺前者市佔率逾60%,美團(3690)喺後者市佔率亦逾60%。阿里、美團呢類平台老大,現時宜避開;一直投訴受到阿里天貓「二選一」競爭優勢打壓嘅京東(9618),反而有機受惠。京東仲有兩大賣點,其一具有染藍概念,其二分拆京東物流上市,據講已揀美銀、高盛籌辦IPO。不過,宜候回吐分注吸納,始終科網股仍喺刀口上。

港股喺2021年首個交易日紅盤高收0.9%,報27,472。新經濟股仍受注目,SaaS(軟件即服務)股爆升,當中,為房地產商提供SaaS產品嘅明源雲(909),上年9月25日上市,截至年底,一季升幅已跑贏ATM一年升幅,不妨留意。

割柑人

關心你飯碗,貼近你生活,即Like「蘋果ATM」FB專頁!
BannerBanner