【智取大市】拜登倒米益港股 - 晉佳

更新時間 (HKT): 2021.01.06 02:00
■假如拜登上場之前,市場繼續反映美國懷柔政策預期嘅話,中強美弱嘅趨勢玩多至少兩個星期。 資料圖片

紐交所縮沙唔制裁中資電訊股,中移動(941)固然受惠,更重要係強化咗近排極罕有嘅中強美弱嘅趨勢,吸引資金留喺港股市場。

不過要記住一樣嘢,假若美國態度軟化會引發資金由美股流入港股嘅話,呢個趨勢絕對只會相當短暫,寧願預計美國好快重拾強硬態度以吸引資金回流,都冇理由相信美國會一直倒自己米。

假如去到1月20日拜登上場之前,市場繼續反映美國懷柔政策預期嘅話,中強美弱嘅趨勢玩多至少兩個星期,以𠵱家港股亢奮嘅程度,就已經笑三聲。大家望一望單日成交2,150億,安碩A50(2823)、港交所(388)以至耀才(1428)個圖,都feel到假如爆邊起上嚟可以幾咁誇張。

半新股如入無人之境,連農夫山泉(9633)鍾睒睒身家都升到超越畢菲特,直逼朱克伯格,之前推介嘅榮昌生物(9995)都去到準備分段食糊之際,落後半新股亦有可能遲來先上岸。藥明生物(2269)股東又一次配股,而藥明巨諾(2126)近日喺現水平連番出現支持,目前只較招股價23.8元高一成左右。藥明巨諾係系內CAR-T療法嘅分支,已有產品進行新藥申請,有brand亦有概念,100億市值左右,只係金斯瑞(1548)嘅一半,配合半新股當炒,短線值博率睇嚟相當唔錯。

晉佳

fb.com/advanceguy1

關心你飯碗,貼近你生活,即Like「蘋果ATM」FB專頁!
BannerBanner